Bu haqda «Kasbiy taʼlim tashkilotlari qabul parametrlari va ularning samaradorligi» nomli axborot-tahliliy maʼlumotda qayd etilgan. Tahlil Kasbiy taʼlim agentligi taqdim etgan rasmiy maʼlumotlar asosida shakllantirilgan.
Hujjatga koʻra, 2025-2026 oʻquv yili uchun texnikumlarga 287 301 ta qabul kvotasi ajratilgan. Amalda 249 130 nafar oʻquvchi oʻqishga qabul qilingan. Hisobotning taʼlim shakllari boʻyicha jadvalida umumiy qabul rejasi 86,7 foizga bajarilgani koʻrsatilgan.
Eng koʻp tanlangan kasblar
Qabulning eng katta qismi - 20 foizi «Avtomobillarni taʼmirlash va ularga xizmat koʻrsatish» kasbi hissasiga toʻgʻri kelgan. Bu yoʻnalishga 27 660 ta oʻrin ajratilgan boʻlsa, amalda 50 116 nafar oʻquvchi qabul qilingan.
Shuningdek, umumiy qabulda quyidagi kasb va mutaxassisliklar salmoqli ulushni egallagan:
- tikuvchi - 7 foiz;
- hamshiralik ishi - 6,2 foiz;
- traktorchi-mashinist - 5 foiz;
- davolash ishi - 4,1 foiz;
- kompyuter grafikasi va dizayn operatori - 3,8 foiz;
- raqamli axborotlarni qayta ishlash ustasi - 3,4 foiz.
Tahlilda ayrim mutaxassisliklarda qabul belgilangan kvotalardan bir necha barobar oshgani, boshqalarida esa ajratilgan oʻrinlar toʻlmagani qayd etilgan.
Biroq qabulning nol yoki juda past darajada boʻlishi har doim ham muayyan kasbga talab yoʻqligini anglatmasligi taʼkidlangan. Ayrim hollarda guruh tashkil etish uchun yetarli oʻquvchi toʻplanmagani sababli ular oʻz roziligi bilan yaqin yoʻnalishlarga oʻtkazilgan.
Hududlar oʻrtasida sezilarli farq bor
Hisobotda Fargʻona va Samarqand viloyatlarida qabul rejasi toʻliq bajarilgani koʻrsatilgan. Buxoro va Andijonda bu koʻrsatkich 96 foizni, Jizzaxda 93 foizni, Namanganda 92 foizni tashkil etgan.
Qoraqalpogʻistonda qabul rejasining bajarilishi 65 foiz, Xorazm viloyati va Toshkent shahrida 70 foiz, Navoiy viloyatida 72 foiz boʻlgan. Shu tariqa, hududlar oʻrtasidagi farq 35 foiz punktga yetgan.
