Eron aviakompaniyalari AQSH mamlakat aviatsiya sanoatiga qarshi sanksiyalarni kuchaytirganidan keyin xalqaro reyslarning bir qismini bekor qildi. Bu haqda AFP, Bloomberg va Iran International kabi nashrlar xabar berdi. AFP xabariga koʻra, Tehrondagi sayyohlik agentligi Bagʻdod, Maskat, Qatar, Gurjiston va Ozarboyjonga parvozlar toʻxtatilganini tasdiqladi.
AQSH qanday sanksiyalar joriy etdi?
8-sentabr kuni AQSH Moliya vazirligi Eron aviatsiyasi bilan bogʻliq 36 ta obyektni, jumladan, 27 ta aviakompaniyani sanksiyalar roʻyxatiga kiritdi. Idoraning taʼkidlashicha, bu soha qurol-yarogʻ, harbiy va noqonuniy yuklarni tashish uchun ishlatilgan.
21-sentabr kuni AQSH moliya vaziri Skott Bessent 23-sentabrdan boshlab Eron tashuvchilari amalda xalqaro operatsiyalardan mahrum boʻlishini eʼlon qildi. U CNBC telekanaliga bergan intervyusida Eronning barcha aviakompaniyalari butun dunyo boʻylab yopilishini aytdi. Ularning samolyotlariga yoqilgʻi quyadigan, ularga xizmat koʻrsatadigan yoki chipta sotadiganlarni dollar tizimidan uzib qoʻyish bilan tahdid qildi. U bu choralarni qariyb yetti oylik urushdan soʻng Eron uchun vaʼda qilingan «iqtisodiy D-Day»ning bir qismi deb atadi.
Sanksiyalar Eron samolyotlariga boshqa davlatlar havo hududiga kirishni taqiqlamaydi. Aeroportlar, yoqilgʻi va xizmat koʻrsatish kompaniyalari hamda banklarga bosim oʻtkazilmoqda, ularsiz parvozlar amalga oshirilishi mumkin emas.
Kimlar parvozlarni toʻxtatdi?
Gurjiston 21-sentabrdan boshlab Eron aviatashuvchilarining reyslarini toʻxtatdi. Ozarboyjon 22-sentabrdan boshlab toʻxtatilganini eʼlon qildi. Eron fuqaro aviatsiyasi maʼlumotlariga koʻra, Bagʻdod aeroporti 23-sentabr kuni ertalabdan beri Eron reyslarini qabul qilishni toʻxtatgan, Maskat (Oʻmon) esa eronlik yoʻlovchilarni qabul qilmayapti. Bu, ayniqsa, Iroqning Najaf va Karbalo shaharlariga uchadigan ziyoratchilarga taʼsir qiladi.
Xorijiy aviakompaniyalar ham parvozlarni toʻxtatmoqda. Turkish Airlines kamida 2027-yil martigacha Eronga barcha reyslarni toʻxtatdi. Lufthansa (Germaniya) va Austrian aviakompaniyalari parvozlarni kamida 24-oktabrgacha bekor qildi, Emirates (BAA) esa Tehronga parvoz qilmayapti. Qatar Airways 29-noyabrdan parvozlarni qayta tiklashni rejalashtirmoqda, biroq aviakompaniyalar muddat saqlanishiga kafolat bermaydi. Iran International maʼlumotlariga koʻra, Mahan Air Turkiya aeroportlarida yer usti xizmatlaridan mahrum boʻldi va u yerdan ketdi.
Qaysi parvozlar davom etmoqda?
