Ronaldu boʻsh darvozaga gol urolmadi, Isroilda ahmoqona qizil
|11:116 10510 min
Klopp va Xavi Germaniya va Niderlandiya milliy jamoalari boshqaruvidagi debyutida oʻzaro toʻqnashdi. Ronaldu faoliyatidagi 980-golni ura olmasdan maydonni tark etdi. Holand esa yoʻlidan chiqqan raqibga gol urishda davom etmoqda: u milliy jamoadagi 56-oʻyinida 63 va 64-gollarini urishga erishdi.
Foto: ReutersFoto: Reuters
Payshanba oqshomida Millatlar ligasida 1-tur oʻyinlari boshlandi.
Krishtianu Ronaldu oʻzi uchun qadrdon boʻlgan «Joze Alvalade» stadionida milliy jamoa bilan xayrlashishi haqidagi xabarlar quruq gapligicha qoldi. 41 yoshli futbolchi shu kuni Portugaliya libosida 234-oʻyinini oʻtkazdi va bu oxirgisi emas.
Stadionga yigʻilgan muxlislar uning toʻpga har teginishini olqishlar bilan qarshi olishdi, ammo u oʻyin boshida yaxshi vaziyatdan foydalana olmadi. Oʻyindagi hisobni esa uning «An-Nasr»dagi jamoadoshi Joau Felish ochdi: yarimhimoyachi 22-daqiqada jarima maydoni tashqarisidan yoʻllagan zarbadan keyin toʻp raqib himoyachisiga tekkan holda yoʻnalishini oʻzgartirdi va pastki burchakka borib tushdi.
Krishtianu Ronaldu ikkinchi boʻlim boshida faoliyatidagi 980-golini urishga juda yaqin keldi, ammo deyarli boʻsh darvoza qarshisida turgan holda toʻpni yuqoriga tepib yubordi.
U baribir Bruno Fernandeshning pasidan keyin darvozani ishgʻol etganida esa kichik ofsayd holati qayd etildi.
Shu kuni portugallar sardori maydonni golsiz tark etdi – murabbiy 67-daqiqada uni almashtirdi. Ammo portugallar usiz ham gʻalabali hisobni saqlab qoldi va titul himoyasini muvaffaqiyatli boshladi.
Skandinavcha triller
Norvegiya – Daniya 3:2 Gollar: Bobb, 14 (1:0). Holand, 18 (2:0). Damsgor, 25 (2:1). Hoylund, 60 (2:2). Holand, 74 (3:2)
Guruhdagi ikkinchi oʻyin esa skandinavlar derbisiga aylandi. Norvegiya 18-daqiqaga kelib ikki toʻp farqi bilan oldinga chiqib olgandi – Oskar Bobb va Erling Holand oʻz nomini tabloga yozdirib qoʻydi. Ammo daniyaliklar oʻyinga qayta olishdi: Mikkel Damsgor tezda hisobni qisqartirdi, ikkinchi boʻlimda esa Rasmus Hoylund muvozanatni tikladi.
Natijada Holand yana bir bor oʻzini koʻrsatishiga toʻgʻri keldi – 74-daqiqada u Edegor yordamida («Arsenal» sardori birinchi boʻlimda Bobbning hisobni ochuvchi goliga ham hammualliflik qilgandi) gʻalaba golini urdi. Erling milliy jamoa safida fantastik natija qayd etmoqda – u 56 oʻyinda allaqachon 64 ta gol urishga erishdi. Bu bilan u afsonaviy nemis hujumchisi Gerd Myullerning natijasini takrorladi.
Norvegiyalik kiborgning hozirgi sport formasi aql bovar qilmas darajada: klub va milliy jamoa safidagi soʻnggi olti oʻyinida darvozalarni 9 bor ishgʻol qilgan va bu oraliqda birorta oʻyinni golsiz tark etmagan. Endi hafta oxirida muxlislar Erling va Krishtianu duetiga guvoh boʻlishadi.
A ligasi, 2-guruh
Xavi Kloppga qarshi
Niderlandiya – Germaniya 1:1 Gollar: Nmecha, 32 (0:1). Gakpo, 90+2 (1:1) Niderlandiya: Verbryuggen, van Deyk, van Hekke, van de Ven, Dyumfris, Gravenberh, Timber (Verman, 57), Reynders (Til, 83), Gakpo, Sammervill (van Bommel, 83), Brobbi (Meyerdink, 35) Germaniya: ter Shtegen, Ta, Shlotterbek, Braun, Troy, Kimmih, Nmecha (Shtah, 64), Amiri (Engelhardt, 80), Shade (Fyurix, 64), Adeyemi (Gnabri, 80), Havers (Ebnutalib, 30) Ogohlantirishlar: Timber, 22. van Hekke, 24. Dyumfris, 68 – Amiri, 68
A2 guruhidagi ikki favorit – Yurgen Klopp boshchiligidagi Germaniya hamda Xavi oʻz qoʻliga olgan Niderlandiya jamoalari birinchi turdayoq toʻqnashdi. Bu ikki murabbiy uchun milliy jamoalar boshqaruvidagi ilk oʻyin edi va unda mezbonlar oʻyinga qoʻshib berilgan daqiqalarda magʻlubiyatdan qutulib qolishdi.
13-daqiqada mezbonlar darvozani ishgʻol etgandi, ammo Brobbi tomonidan darvozabonga fol ishlatilgan deb topildi va van Deykning goli bekor qilindi.
30-daqiqada esa «Arsenal» hujumchisi Kay Havers oʻz jamoadoshi Yurriyen Timberning egizak ukasi Tventin tomonidan ishlatilgan foldan keyin jarohat olib maydonni tark etdi.
32-daqiqada Feliks Nmecha Yurgen Klopp jamoasini hisobda oldinga olib chiqdi va bu ustunlik oʻyinga qoʻshib berilgan daqiqalargacha saqlanib qoldi.
Serbiya oʻz maydonida kechgan oʻyinda Gretsiya kambek amalga oshirishiga imkon berdi – 1:2. Oʻyinning toʻrtinchi daqiqasidayoq Andriy Jivkovich hisobni ochgandi. Yovich boʻlim oʻrtalarida uchrashuv taqdirini hal qilib qoʻyishi mumkin edi, ammo u qulay vaziyatda turib toʻpni toʻsindan yuqorilatib tepdi.
Shundan keyin greklar mezbonlar darvozasini qamal qilishga kirishdi va faqat darvozabonning mahorati birinchi boʻlimda hisob tenglashishiga yoʻl qoʻymadi: Savich Zolisning zarbasidan keyin toʻsin ostiga kirib ketayotgan toʻpni toʻxtatdi. Ikkinchi boʻlimda «Arsenal» vingeri baribir oʻz maqsadiga erishdi va hisobni tenglashtirdi. Mehmonlar hujum qilishda davom etishdi va uch baravar koʻproq zarba berishdi (22:8). Yakunda esa haqli gʻalaba golini urishdi, zaxiradan oʻyinga qoʻshilgan «Komo» hujumchisi Anastasios Duvikas 90+5-daqiqada greklarga uch ochko olib keldi.
V ligasi, 3-guruh
Avstriya – Isroil 3:1 Gollar: Shmid, 43 – penalti (1:0). Abu Farhi, 55 (1:1). Mvene, 90 (2:1). Kalayjich, 90+3 (3:1) Avstriya: A. Shlager, Danso, Linhart, Mvene, Posh, K. Shlager, Zayvald (Xorvat, 73), Shmid (Chukvuemeka, 83), Gryull (Vanner, 46), Vimmer (Lang, 73), Gregorich (Kalayjich, 37) Isroil: D. Perets, Revivo, Stoinov, D. Perets (Shlomo, 64), Nahmias, Mizrahiy (Levi, 64), E. Perets, Gluh, Solomon (Turgeman, 73), Halayliy, Abu Farhi Ogohlantirishlar: K. Shlager, 26. Danso, 52. Vimmer, 64 – E. Perets, 31. Abu Farhi, 52 Chetlatish: Abu Farhi, 56 (ikkinchi sariq)
Bu qarama-qarshilikda avstriyaliklar favorit edi, ammo gʻalabaga erishish oson boʻlmadi.
Mezbonlar birinchi boʻlim oxirlarida penaltidan hisobni ochishgandi, 55-daqiqada esa Sayid Abu-Farhi hisobni tenglashtirdi.
Ammo 20 yoshli ushbu forvard shu zahoti ahmoqona vaziyatga tushib qoldi: u oʻz golini burchakdagi bayroqchani koʻtarib, nishonladi. Bosh hakam Georgiy Kabakov esa unga bu harakati uchun sariq kartochka koʻrsatdi. Bir necha daqiqa oldin Abu-Farhi raqibga burchak zarbasini amalga oshirishga toʻsqinlik qilgani uchun birinchi sariq kartochkani olgandi va ikkinchi sariqdan keyin maydonni tark etishga majbur boʻldi.
Maʼlum boʻlishicha, hakam futbolchining gol nishonlashdagi harakatini «quroldan oʻq uzishga taqlid» deb baholagan. IFAB 12-qoidasida golni nishonlashda futbolchi provokatsion, masxaralovchi yoki nizoli tarzda harakat qilsa, sariq kartochka olishi kerakligi koʻrsatilgan.
Isroilliklar ozchilik boʻlib qolganiga qaramay, 90-daqiqagacha durang hisobni ushlab turishdi. Ammo oʻyinga qoʻshib berilgan daqiqalarda Filipp Mvene va Sasha Kalayjich baribir raqibni taslim etishdi.
Irlandiya kosovoliklar maydonida oʻz oʻyinini namoyish eta olmadi va mezbonlar zarbalar berishda mutlaq ustunlikka erishdi – 23:3.
Oʻyin taqdirini bu mavsum «Fenerbahche»da porlayotgan Muriki (oxirgi turda ushbu tajribali hujumchi pokerga erishdi) urgan gol hal qildi. Birinchi boʻlim oxirida uning bosh bilan yoʻllagan zarbasidan keyin toʻqqizlikka qarab ketayotgan toʻpni Kelleher qaytarib qolgandi. Ammo oʻyin oxirlarida darvozabon baribir ushbu hujumchi qarshisida ojiz qoldi. Murikining dastlabki zarbasi toʻsindan qaytdi, uning oʻzi qaytgan toʻpni darvozaga kiritib yubordi.
Litva va Malta safarda gʻalaba qozondi
D1 va D2 guruhlarida Yevropa futboli autsayderlari ham oʻz ishtirokini boshladi.
● Malta Andorradan irodali gʻalaba bilan qaytdi – 2:1. Gilom Lopes 17-daqiqada andorraliklarni oldinga boshlagandi, ammo mezbonlar shu kuni hatto durangga ham erisha olmadi. Orolliklar birinchi boʻlimdayoq hisobni tenglashtirishdi, 81-daqiqada esa Teddi Teuma gʻalaba golini urdi.
● Litva ham safarda gʻalaba qozondi – Lixtenshteyn ustidan 2:0 hisobida. Oʻyin taqdirini 53- va 66-daqiqalarda urilgan gollar hal qildi.
Juma kuni birinchi tur uchrashuvlari davom etadi. Markaziy oʻyinlarda Zinedin Zidan boshqaruvidagi Fransiya Turkiya maydoniga safar qiladi, Italiya Belgiyani qabul qiladi.
