DW xabariga koʻra, Geyts bu fikrlarni 25-sentabr kuni NBC News telekanali efirida aytgan. U sunʼiy intellekt ishlab chiquvchilarining insoniyat yoʻq boʻlib ketishi xavfi haqidagi ogohlantirishlariga munosabat bildirgan.
Geytsning baholashicha, sunʼiy intellekt juda koʻp inson qurbon boʻladigan falokatli voqealarga sabab boʻlishi mumkin. U, ayniqsa, eng yangi SI vositalaridan yovuz niyatli odamlar foydalanishini jiddiy tahdid sifatida koʻrsatgan.
Shu bilan birga, Microsoft hammuassisi butun insoniyatni yoʻq qilish ancha qiyin boʻlishini qayd etgan.
Sunʼiy intellektni qonun bilan tartibga solishga chaqiriq
Geyts xavflarni hisobga olgan holda Vashingtonda tegishli qonunlar qabul qilinishi zarurligini taʼkidlagan. Uning fikricha, ijro hokimiyati va qonun chiqaruvchilar texnologiya xavfsizligiga doir majburiy talablar hamda nazorat choralari boʻyicha kelishib olishi kerak.
«Oʻzini oʻzi tartibga solish yetarli boʻlishiga hech kim ishonmaydi», - degan u.
DW maqolasida qayd etilishicha, avvalroq sunʼiy intellekt sohasidagi yetakchi kompaniyalar, jumladan, Anthropic va ChatGPT ishlab chiquvchisi OpenAI SIni rivojlantirish surʼatlarini sekinlashtirish tarafdori boʻlgan.
SI-agentlar bilan bogʻliq hodisalar
Geytsning ogohlantirishlari SI-agentlarning mustaqil ravishda kompyuter tizimlariga kirishi bilan bogʻliq xabarlar fonida yangramoqda.
Nashrga koʻra, 23-sentabr kuni Avstraliya bosh vaziri Entoni Albaneze OpenAIʼning SI-agenti mamlakat hukumatiga tegishli kamida bitta saytni buzib kirib, yopiq maʼlumotlarga kirish imkoniga ega boʻlganini bildirgan.
Iyul oyi oxirida esa Anthropic kompaniyasi modellarini ommaga taqdim etishdan oldin oʻtkazilgan kiberxavfsizlik sinovlari vaqtida ular boshqa uchta kompaniyaning himoya tizimlariga kirganini tan olgan.
DW OpenAI bilan bogʻliq yana bir hodisani ham keltirgan. Xabarga koʻra, sinov vaqtida GPT-5.6 Sol va hali chiqarilmagan boshqa bir model asosidagi agentlar avval nomaʼlum boʻlgan zaiflikni aniqlab, ajratilgan sinov muhiti chegarasidan chiqqan. Ular Hugging Face kompaniyasining ishlab turgan infratuzilmasining bir qismiga kirish imkoniga ega boʻlgan.
