«Huquqiy axborot» kanalida maʼlum qilinishicha, farmonga muvofiq, 2027-yil 1-yanvardan Oʻzbekistonda «Yashil lot» tizimi yoʻlga qoʻyiladi.
Tizim doirasida Ekologiya qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga mavjud yer uchastkalarini jismoniy va yuridik shaxslarga shartnoma asosida, nom berish orqali yashil bogʻ barpo etish uchun ajratish huquqi beriladi.
Ushbu hududlardan faqat belgilangan maqsadda foydalanish mumkin boʻladi. Ular jismoniy va yuridik shaxslarga mulk sifatida oʻtkazilmaydi. Bogʻlarda qurilish qilish, konstruksiyalar oʻrnatish va boshqa faoliyat turlarini olib borish taqiqlanadi. Aholining bu hududlardan umumiy foydalanishi cheklanmaydi.
Shuningdek, 2026-yil kuz mavsumidan yer maydoni cheklangan mahallalarda, koʻp kvartirali uylar oraligʻida, maktab va bogʻchalar hovlilarida mahalla mikrooʻrmonlari tashkil etiladi. Bunda 200–1 000 kvadrat metr maydonning har bir kvadrat metriga kamida ikkita daraxt va buta koʻchati qatlamlab, zich ekiladi.
Mikrooʻrmonlarni mahalliy hokimliklar Oʻzbekiston mahallalari uyushmasi, Oʻrmon agentligi hamda Qurilish va uy-joy kommunal xoʻjaligi vazirligi bilan birgalikda barpo etadi.
Yer ajratish imkoniyati boʻlmagan yoki beton va asfalt qoplamali hududlarda esa jamoatchilik kichik bogʻlari tashkil etiladi. Buning uchun mahalliy hokimliklar va homiylar katta hajmli koʻchat tuvaklarini oʻrnatadi, Oʻrmon agentligi sifatli koʻchatlar yetkazib beradi. Mahallalar xohish bildirgan fuqarolar ishtirokida koʻchat ekish va parvarishlash ishlarini tashkil etadi.
