Bu choralar prezidentning 2026-yil 22-sentabrdagi «Yoqilgʻi-energetika tarmogʻini yanada rivojlantirish chora-tadbirlari toʻgʻrisida»gi PF–202-son farmonida belgilandi.
Vazirlik, regulyator va inspeksiya vazifalari ajratiladi
Farmonga koʻra, Energetika vazirligining tarmoq korxonalari va isteʼmolchilarga shartnomaviy, xizmat koʻrsatish va boshqa xoʻjalik munosabatlari boʻyicha individual ruxsatnomalar berish amaliyoti bekor qilinadi.
Energetika bozorini rivojlantirish va tartibga solish agentligiga elektr energiyasi bilan bir qatorda tabiiy va suyultirilgan gaz taʼminotida ham bozor tamoyillarini bosqichma-bosqich shakllantirish hamda tartibga solish vazifalari yuklatildi.
2028-yildan agentlik elektr energiyasi, tabiiy va suyultirilgan gaz taʼminotida tartibga solinadigan tariflar hamda toʻlovlarni tasdiqlaydi. Shuningdek, isteʼmolchilar huquqlarini himoya qilish, xizmatlar sifatini kuzatish va murojaatlarni koʻrib chiqish tizimini joriy etadi.
Elektr energiyasi, neft mahsulotlari va gazdan foydalanishni nazorat qilish inspeksiyasi faoliyatida qoidabuzarliklarning oldini olish va xavflarni erta aniqlashga eʼtibor kuchaytiriladi. Ogohlantirish va kamchiliklarni ixtiyoriy bartaraf etish uchun muddat berish amaliyoti qoʻllanadi.
Tarmoq korxonalari esa resurslarni qazib olish, ishlab chiqarish, qayta ishlash, tashish, saqlash, uzatish, taqsimlash va sotish bilan bogʻliq tijorat vazifalarini bajaradi.
Investitsiya loyihalari tanlov asosida amalga oshiriladi
Hujjatda yonilgʻi-energetika tarmogʻida quyidagilar qatʼiy taqiqlangan:
investorlar bilan toʻgʻridan toʻgʻri muzokaralar olib borish;
loyihalar doirasida individual imtiyoz va preferensiyalar berish;
investitsiya rejasiga kiritilmagan loyihalarni boshlash.
Loyihani amalga oshiruvchi qonunchilikda belgilangan tartibda tanlov asosida aniqlanadi. Tanlov hujjatlari ochiq eʼlon qilinadi.
Obyektlarni loyiha-smeta hujjatlarini ishlab chiqish va moliyalashtirish bilan bir vaqtda qurish yoki rekonstruksiya qilishga ruxsat berilmaydi. Xususiy investitsiyalar hisobidan quriladigan obyektlar bundan mustasno.
