DW xabariga koʻra, Sumi viloyati harbiy maʼmuriyati rahbari Oleg Grigorov shahardagi turar joylar va maktabga toʻrtta boshqariladigan aviabomba bilan zarba berilganini maʼlum qilgan. Ikki kishi xususiy uylar joylashgan hududda halok boʻlgan.
Viloyat politsiyasi maʼlumotiga koʻra, xususiy turar joylar hududida 3, 6 va 15 yoshli uch bola yaralangan. Kamida yettita xonadon zararlangan.
Shahar markazidagi maktabga zarba darslar vaqtida berilgan. Ukraina prezidenti Volodimir Zelenskiyning aytishicha, hujum paytida oʻquvchilar va oʻqituvchilar panohgohda boʻlgan. Jami qariyb 100 kishi panohgohga evakuatsiya qilingan.
Maktabga hujumdan soʻng olti kishi, jumladan, uch bola tibbiy yordam soʻrab murojaat qilgan.
Bundan tashqari, Rossiya qoʻshinlari Sumidagi markaziy qabristonga ham aviabomba bilan zarba bergan. «Suspіlne Sumi» nashrining maʼlum qilishicha, hujum oqibatida qabrlar zararlangan.
