DW nashrining dpa agentligiga tayanib xabar berishicha, Germaniyada «yonilgʻi chegirmasi» - Tankrabatt 1-oktabrga oʻtar kechasi kuchga kirgan.
Tankkönig portali maʼlumotlariga koʻra, 30-sentabr soat 23:41 dan 1-oktabr soat 00:41 gacha benzinning mamlakat boʻyicha oʻrtacha narxi litriga 10–11 sentga kamaygan. 1-oktabr ertalab ham avvalgi haftalardagi narxlarga nisbatan deyarli shunday farq saqlanib qolgan.
Germaniya avtomobil klubi - ADAC maʼlumotlariga koʻra, koʻplab yonilgʻi quyish shoxobchalarida eng arzon benzin turi - Super-E10 narxi litriga 2 yevrodan pastlagan.
Biroq hududlar oʻrtasida farq bor. Myunxen, Shtutgart va Leypsigda bunday narx juda koʻp shoxobchalarda, Berlinda esa koʻplab shoxobchalarda qayd etilgan. Gamburgda benzinni 2 yevrodan arzonga faqat ayrim shoxobchalardan topish mumkin boʻlgan.
Kyolnda esa 1-oktabr ertalab holatiga benzin narxi 2 yevrodan tushgan birorta shoxobcha qayd etilmagan. Shunga qaramay, Tankkönig kuzatuvlarida mamlakat boʻyicha oʻrtacha narx 2 yevrodan sezilarli past boʻlgan.
Chegirma qanday ishlaydi?
Litriga 16,7 sentlik soliq yengilligi 1-oktabr soat 00:00 dan boshlab omborlar va neftni qayta ishlash zavodlaridan chiqarilgan benzin hamda dizel yonilgʻisiga tatbiq etiladi.
Biroq bu chakana narxlar aynan 16,7 sentga pasayishi kafolatlanganini anglatmaydi. Yonilgʻi quyish shoxobchalari narxni toʻgʻridan toʻgʻri shunchaga tushirishga majbur emas.
«Bu chegirma isteʼmolchilarga toʻliq hajmda yetib boradimi-yoʻqmi, yaqin kunlarda maʼlum boʻladi», - deya qayd etgan dpa.
Hukumat mazkur chorani benzin va dizel narxlarining keskin oshishiga javoban qabul qilgan. Agentlikka koʻra, sentabr yonilgʻi narxlari boʻyicha boshqa oylardan ancha qimmat boʻlgan va bu umumiy inflyatsiya darajasiga ham taʼsir koʻrsatgan.
Soliq imtiyozlari bahslarga sabab boʻlmoqda
Hukumat chorasini tanqid qilayotganlar chegirmaning amaldagi aniq hajmini hisoblash qiyinligini aytmoqda. Ularning fikricha, bunday yengilliklar avtomobil egalarining yonilgʻini tejashga qiziqishini pasaytiradi, soliq kamayishidan keladigan foyda esa isteʼmolchilarga toʻliq yetib bormaydi.
