Taklif etilayotgan loyihaga koʻra, yangi tizim 2028/29 yilgi mavsumdan joriy etilishi mumkin.
Dastlabki taqvim quyidagicha:
Oʻzbekiston kubogi - 2028-yil 1-martdan 31-maygacha;
yozgi transfer oynasi - 1-iyuldan 9-sentabrgacha (10 hafta);
Superliganing birinchi davrasi - 18-avgustdan 24-dekabrgacha;
qishki transfer oynasi - 2029-yil 2-yanvardan 13-fevralgacha (6 hafta);
Superliganing ikkinchi davrasi - 23-fevraldan 31-maygacha.
Shu tariqa, amaldagi bahor-kuz formati oʻrniga chempionat avgust oyida boshlanib, keyingi yil may oyida yakunlanadigan tizim taklif etilmoqda.
Agar taklif maʼqullansa, bu Oʻzbekiston chempionati tarixidagi ilk kuz-bahor mavsumi boʻladi. Oʻzbekiston Superligasi (avvalgi Oliy liga) 1992-yilda tashkil etilganidan buyon doimo bahor-kuz tizimida, yaʼni bir kalendar yil doirasida oʻtkazilgan.
PFL hozircha yangi tizimga oʻtish sabablarini keltirmadi. Biroq bu Osiyo futbol konfederatsiyasi klub musobaqalari taqvimiga moslashish bilan bogʻliq boʻlishi mumkin. OFK 2022-yilda klub musobaqalarini kuz-bahor tizimiga oʻtkazishga qaror qilgan va yangi taqvim 2023/24 mavsumidan amal qila boshlagan.
Ikki xil taqvim oʻzbek klublarining OFK turnirlaridagi ishtirokida uzoq tanaffus yuzaga kelishiga sabab boʻlmoqda. Masalan, 2025-yil noyabrida Oʻzbekiston chempioni boʻlgan «Neftchi» OFK Chempionlar ligasidagi ilk oʻyinini 2026-yil 14-sentabrda - qariyb 10 oydan keyin oʻtkazdi. Yaʼni klub chempionlik orqali Osiyo musobaqasi yoʻllanmasini qoʻlga kiritganidan keyin uni amalda ishlatishi uchun deyarli bir yil kutishiga toʻgʻri keldi.
Superliganing kuz-bahor tizimiga oʻtkazilishi bu muddatni sezilarli qisqartirishi mumkin. Yangi taqvimda may oyida Oʻzbekiston chempioni boʻlgan klub yozgi tanaffusdan soʻng OFK klub musobaqalarida ishtirokini boshlashi mumkin. Bu ichki chempionat yakunlari bilan Osiyo musobaqalari boshlanishi oʻrtasidagi vaqt tafovutini kamaytiradi.
2024/25 mavsumidan OFK klub musobaqalari Chempionlar ligasi Elite, Chempionlar ligasi 2 va Challenge League kabi uch pogʻonali yangi formatda ham kuz-bahor taqvimi asosida oʻtkazilmoqda.
