Vigovskiy 7-oktabr oqshomida eʼlon qilgan maʼlumotga koʻra, qutqaruvchilar va politsiya xodimlari vayronalar ostidan, shikastlangan binolardan hamda yongʻinlardan jami 29 kishini qutqargan.
Ukraina prezidenti Volodimir Zelenskiy shu kuni kechqurun hujumlar oqibatida 100 kishi jarohatlanganini maʼlum qilgan. Uning soʻzlariga koʻra, Rossiya ballistik va qanotli raketalar hamda «Shahed» dronlarini qoʻllagan. Kunduzi ham dronlar va aviabombalar bilan yangi zarbalar berilgan.
Eng ogʻir oqibatlar Chernihiv viloyatining Priluki shahrida qayd etilgan. Bu yerda raketa koʻp kvartirali turar joy binosiga tushgan. Ichki ishlar vaziri maʼlumotiga koʻra, halok boʻlgan besh bolaning uch nafari bir yoshda boʻlgan.
Vazir xabar bergan paytda Prilukida vayronalarni tozalash va qidiruv-qutqaruv ishlari 14 soatdan ortiq davom etayotgan edi. Chernihiv viloyati harbiy maʼmuriyati rahbari Vyacheslav Chaus avvalroq shaharda 50 dan ziyod kishi jabrlanganini bildirgan.
Zelenskiyning aytishicha, 7-oktabrda Ukrainadagi 13 hudud hujumga uchragan. Rossiya qoʻshinlari 70 ta raketa, shuningdek, zarbador dronlarni qoʻllagan.
Ukraina prezidenti xalqaro yetakchilarni hujumlarga munosabat bildirishga chaqirgan. U Rossiyaga nisbatan sanksiyalarni yumshatish yoki ayrim oligarxlardan cheklovlarni olib tashlash haqidagi signallarni tanqid qilgan.
Zelenskiyning fikricha, Rossiyaning neft sotishdan daromad olishda davom etayotgani urushni moliyalashtirish imkonini saqlab qolmoqda. U buni Ukraina bilan birga Yevropa va Gʻarb mamlakatlari uchun ham muammo deb baholagan.
Qurbonlar va jarohatlanganlar haqidagi raqamlar Ukraina rasmiylarining 7-oktabr kechqurungi bayonotlariga asoslangan.
