DW xabariga koʻra, «Mediazona» jurnalistlari halok boʻlgan harbiylarning ismlarini aniqlab, surishtiruv natijalarini 9-oktabrda eʼlon qilgan.
Aniqlangan 20 ofitserning 18 nafari zarba berilgan kuni, yana ikki nafari esa keyinroq olgan jarohatlaridan vafot etgan. Ular orasida yetti nafar polkovnik va toʻrt nafar podpolkovnik boʻlgan.
Nashr maʼlumotiga koʻra, halok boʻlganlar «Markaz» qoʻshinlar guruhiga tegishli shtablarda - Markaziy harbiy okrug va 41-umumqoʻshin armiyasi shtablarida xizmat qilgan.
Jurnalistlar ikki shtabning shaxsiy tarkib roʻyxatlarini meros ishlari reyestri, boshqa davlat reyestrlari va harbiylar haqidagi taʼziya xabarlari bilan solishtirib, ularning shaxsini aniqlagan.
Ukraina Qurolli kuchlari Rossiya egallab olgan Donetskka 26-avgust kechqurun raketa zarbasi bergan. Oʻsha paytda maʼmuriyat rahbari Denis Pushilin nishon «Donetsk Siti» savdo markazi boʻlganini bildirgan. Uning aytishicha, hujumda Storm Shadow/SCALP-EG raketalari qoʻllangan.
Biroq ochiq manbalar asosida tahlil olib boruvchi OSINT loyihalari zarbalar Rossiya armiyasining qoʻmondonlik punktlariga qaratilgan boʻlishi mumkinligini taxmin qilgan.
Ukrainaning Exile+ Telegram-kanali zarbalardan biri urushgacha ilmiy-tadqiqot va sanoat muassasalari joylashgan binoga tushganini bildirgan. «KіberBoroshno» kanali esa nishonlardan yana biri qurilishi tugallanmagan turar joy majmuasi ostidagi 600 oʻrinli yerosti avtoturargohi boʻlganini maʼlum qilgan.
OSINT loyihalari har ikki obyektdan Rossiya harbiylari qoʻmondonlik punkti sifatida foydalangan boʻlishi mumkinligini aytgan.
