Davlat xavfsizlik xizmatining Toshkent shahar boʻyicha boshqarmasi va shahar IIBB xodimlari hamkorlikda oʻtkazgan tezkor tadbirda avtomobil Yunusobod tumanidagi «Uch qahramon» YPX maskanida toʻxtatilgan.
Tekshiruvda mashinada yoʻlovchi sifatida ketayotgan, 2004-yilda Surxondaryo viloyatida tugʻilgan shaxsga tegishli sellofan paketdan 200 ta zip-paketga qadoqlangan jami 365 gramm «Mefedron» topilgan. Moddalar ashyoviy dalil sifatida olingan.
Tadbir davomida uning Toshkent tumanida vaqtincha yashab turgan xonadoni ham koʻzdan kechirilgan. U yerdan yana 734 gramm «Mefedron», 63 gramm «Alfa-PVP» va 45 gramm «Spays» aniqlangan.
Shuningdek, xonadondan ikkita elektron tarozi, zip-paketlar va boshqa ashyolar protsessual tartibda rasmiylashtirib olingan.
Xabarda qayd etilishicha, mazkur shaxs muqaddam oʻgʻirlik bilan bogʻliq jinoyat uchun sudlangan. Tezkor tadbir maʼlumotlariga koʻra, u internet orqali narkotik sotuvchi doʻkonda moddalarni yashirin joylarga qoldirib ketuvchi - «zakladchik» sifatida faoliyat yuritgan.
Holat yuzasidan unga nisbatan jinoyat ishi qoʻzgʻatilgan. Tergov harakatlari davom etmoqda.
