Bosh prokuratura huzuridagi Departament tomonidan o‘tkazilgan tergovga qadar tekshirishda HST, VEK va RBMT MChJ mansabdor shaxslari va boshqalar jinoiy yo‘l bilan topilgan daromadlarni legallashtirganliklari aniqlangan.
Xabar qilinishicha, ular Telegram messenjyerida narkotik va psixotrop moddalarning noqonuniy savdosi bilan shug‘ullanuvchi xalqaro guruhga tegishli 58 ta Telegram bot orqali sotilgan narkotik va psixotrop vositalari uchun kelib tushgan 20,9 mlrd so‘mni 14 nafar xorijiy fuqaro nomiga O‘zbekiston banklarida ochilgan 90 ta soxta (drop) kartaga, 8 mlrd so‘mini Paynet faoliyati bilan shug‘ullanuvchi HST va VEK MChJlarga hamda 4,7 mlrd so‘mini CP kriptodo‘koniga o‘tkazishgan.
Keyin esa ushbu va boshqa mablag‘larni jamiyatlarning hisob raqamlariga o‘tkazib olishgan.
Shuningdek, ular aholiga 621,2 mlrd so‘mlik Paynet xizmatlarini ko‘rsatishib, 90,3 mlrd so‘mlik soliq to‘lovlarini to‘lashdan bo‘yin tovlaganliklari aniqlangan. Bundan tashqari, ushbu faoliyatdan orttirilgan mablag‘lar hisobidan 50,5 mln AQSh dollari miqdorida noqonuniy kriptoaktivlar aylanmasini amalga oshirib, shundan 2,4 mln AQSh dollari miqdoridagi kriptoaktivlarni 14 nafar chet el fuqarosining valyuta hisob raqamlariga o‘tkazib, jinoiy yo‘l bilan topilgan daromadlarni legallashtirishgan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.
