Parij avtosalonida Citroën kompaniyasi afsonaviy 2CV uslubida ishlangan shahar elektr avtomobili konseptini taqdim etdi. Yangi model asl nusxadan ham ixchamroq boʻlib chiqdi. Elektromobil uzunligi 3,7 metrni tashkil etadi, holbuki uning tarixiy oʻtmishdoshi 3,8 metr boʻlgan. Avtomobilning vazni esa taxminan 1 ming kg.
Konseptning tashqi koʻrinishida klassik 2CV modeliga xos jihatlar saqlangan: alohida oʻrnatilgan yumaloq faralar, boʻrtib turuvchi oyna tozalagichlar va yigʻiladigan matoli tom. Shu bilan birga, avtomobilga yorugʻlik-diodli (LED) optika, 19 dyuymli poʻlat disklar va qora rangli orqa eshik oʻrnatilgan. Kuzov panellari maksimal darajada sodda ishlangan, bamperlar esa taʼmirlash xarajatlarini arzonlashtirish maqsadida boʻlakli qilib yaratilgan.
Salonga komiks uslubidagi grafikaga ega sakkiz dyuymli sensorli ekran oʻrnatilgan. Shu bilan birga, funksiyalarning bir qismi jismoniy tugmalar orqali boshqariladi. Yana bir oʻziga xos jihati - portativ dinamik sifatida ham ishlatish mumkin boʻlgan yechiladigan Radioën radiosi.
Dvigatelning texnik xususiyatlari va yurish zaxirasi hozircha eʼlon qilinmadi. Citroën elektromobil ishlab chiqarishni Yevropada yoʻlga qoʻyishni rejalashtirmoqda. Seriyali versiyaning taqdimoti 2028-yilga - original Citroën 2CV modelining 80 yilligiga moʻljallangan. Yangi modelning taxminiy narxi 15 ming yevroni (2026-yil oktabr holatiga koʻra taxminan 200 mln soʻm) tashkil etadi.
