Hafta davomida kutilayotgan ob-havo bilan iqlimshunos Erkin Abdulahatov tanishtiradi.
Qishloq xoʻjaligiga taʼsir. Hafta boshidagi yogʻingarchilik ayniqsa vodiy va togʻoldi hududlarida tuproq namligining oshishiga xizmat qilishi va kuzgi dala ishlariga toʻsqinlik qilishi mumkin. 14-oktabrdan keyin kutilayotgan quruq va iliq ob-havo dala ishlarini davom ettirish uchun qulay sharoit yaratadi. Shu bilan birga, tungi haroratning pasayishi, ayniqsa togʻli hududlarda issiqsevar ekinlar va kechki hosilni sovuqdan asrashga eʼtibor qaratishni talab etadi. Sugʻorish zaruratini esa tuproq namligi va ekinlarning holatiga qarab belgilash maqsadga muvofiq.
Ob-havo va salomatlikka taʼsir. Hafta boshidagi bulutli va yogʻinli kunlardan keyin kunduzgi harorat koʻtariladi, biroq tunlari salqinlik saqlanadi. Bunday haroratga moslashish uchun mavsumga mos kiyinish, yetarlicha uxlash va jismoniy faollikni saqlash muhim. Antitsiklon taʼsirida shamol susaygan ayrim hududlarda, xususan Toshkent va vodiyda havo sifati yomonlashishi mumkin. Chang va mayda zarrachalar koʻpaygan paytlarda sezgir aholi guruhlari havo sifati haqidagi maʼlumotlarni kuzatib borishi va tegishli sanitariya tavsiyalariga amal qilishi lozim.
