Hukumatning 2026-yil 12-oktabrdagi 560-son qarori bilan qurilishi tugallangan obyektlarni topshirish-qabul qilish va foydalanish uchun ruxsatnoma berish boʻyicha davlat xizmatlari koʻrsatishning maʼmuriy reglamentiga oʻzgartirish kiritildi.
Qarorga koʻra, bunday obyektlarni qabul qilish uchun Vazirlar Mahkamasining hujjatlari bilan Davlat qabul komissiyasi, buyurtmachilar tomonidan esa ishchi komissiya tuziladi.
Obyektlar ushbu komissiyalarning dalolatnomalarini rasmiylashtirish va tasdiqlash orqali toʻgʻridan toʻgʻri foydalanishga qabul qilinadi. Davlat qabul komissiyasining qurilishi yakunlangan loyihalar doirasidagi obyektlarni qabul qilish toʻgʻrisidagi dalolatnomasi komissiya raisi tomonidan tasdiqlanadi.
Davlat qabul komissiyasi dalolatnomasini rasmiylashtirishdan oldin Davlat moliyaviy nazorat inspeksiyasi qurilish obyektida belgilangan tartibda majburiy nazorat oʻlchovini oʻtkazadi.
