Uning soʻzlariga koʻra, Olmaota deklaratsiyasi asosida chegarani delimitatsiya va demarkatsiya qilish natijasida Armanistonning maydoni 29 743 km² ga teng boʻlishi kerak.
Pashinyanning fikricha, chegaraning har ikki tomonida ham anklav va eksklavlar qolmasligi kerak - buning uchun ikki davlat «tengma-teng nisbatda hududlar almashishi» lozim. Shuningdek, u barcha yoʻllar va kommunikatsiyalarni ochish tarafdori ekanini bildirdi. Gap, jumladan, Ozarboyjon hududi orqali Armanistondan Armanistonga va Armaniston hududi orqali Ozarboyjondan Ozarboyjonga tranzit qatnovini yoʻlga qoʻyish haqida bormoqda.
Bosh vazir yana bir shart sifatida Yerevan va Boku bir-biriga nisbatan har qanday daʼvolardan butunlay voz kechishini aytdi. Ular qatorida u ham «Qorabogʻ, Gardman, Shirvon, Naxichevan» mantigʻini, ham «Gʻarbiy Ozarboyjon» mantigʻini tilga oldi.
Pashinyan tinchlikni aynan mana shunday koʻrinishga keltirish qanchalik haqiqatga yaqin, degan masalani eng muhimi deb atadi. Uning soʻzlariga koʻra, Turkmanistonda Ozarboyjon prezidenti Ilhom Aliyev bilan muloqotlardan soʻng, unda bunday imkoniyat mavjudligi haqida dastlabki taassurot paydo boʻlgan. Bosh vazir shunday dedi:
«Yaqin vaqt ichida biz ushbu imkoniyatni roʻyobga chiqarish va uni haqiqatga aylantirish bilan shugʻullanamiz».
Tomonlar chegaraning birinchi qismini 2024-yil aprel oyida dastlabki tarzda kelishib olgan, 2025-yil avgustida esa ikki davlat Tashqi ishlar vazirliklari tinchlik shartnomasi loyihasini eʼlon qilgan edi. Unga koʻra, Yerevan va Boku Olmaota kelishuvlariga muvofiq bir-birining chegaralarini hurmat qilish majburiyatini oladi.
Pashinyan soʻzlariga Ozarboyjon rasmiylari hali munosabat bildirmadi.
