Natijalar RAS Techniques and Instruments jurnalida eʼlon qilingan. Olimlar oq mitti yulduzlarning turli toʻlqin uzunliklaridagi nurlanishini inson koʻrishini taqlid qiluvchi raqamli modellar orqali tahlil qilgan.
Gap yashil yulduzning oddiy fotosurati haqida emas. Hisob-kitoblar inson uni yaqin masofadan kuzatganida qanday rangda koʻrishini aniqlashga qaratilgan.
Oq mittilar - Quyosh kabi yulduzlar evolyutsiyasining oxirgi bosqichida qoladigan oʻta zich jismlar. Ularning oʻlchami Yernikiga yaqin boʻlishi mumkin, ammo massasi Quyosh massasining sezilarli qismini tashkil etadi.
Oddiy yulduzlarning rangi asosan haroratiga bogʻliq. Oq mittilarda esa oʻta zich atmosfera va undagi kimyoviy elementlar nurning ayrim qismlarini kuchli yutib, gʻayrioddiy ranglar hosil qilishi mumkin.
WD J1330+6435 harorati taxminan 4000 daraja Selsiyga teng. Bunday haroratdagi oddiy yulduz qizgʻish-toʻq sariq koʻrinishi mumkin edi. Ammo ushbu oq mitti atmosferasidagi natriy toʻq sariq, kalsiy esa binafsha nurlarni yutadi. Natijada, modelga koʻra, inson koʻzi qolgan nurlanishni och yashil tusda qabul qiladi.
Yulduzning umumiy yoshi taxminan 8,4 milliard yil deb baholangan. Shundan qariyb olti milliard yilini u oq mitti holatida oʻtkazgan.
Tadqiqotda boshqa gʻayrioddiy ranglar ham qayd etilgan. Uglerodga boy ayrim oq mittilar pushti yoki qirmizi-binafsha, sovuqroq vodorod-geliy atmosferaga egalari esa feruza yoki koʻkimtir tusda koʻrinishi mumkin.
Shunga qaramay, bunday ranglar kam uchraydi. Oʻrganilgan oq mittilarning taxminan 3,4 foizidagina oq rangdan sezilarli farq qiluvchi tuslar aniqlangan.
