AQSH davlat kotibi Marko Rubio Markaziy Osiyo mamlakatlari tashqi ishlar vazirlari uchrashuvida ishtirok etish uchun Samarqandga yoʻl oldi. Rubioga mintaqaga, jumladan, muhim foydali qazilmalarni qazib olish va qayta ishlashga sarmoya kiritishdan manfaatdor boʻlgan 200 dan ortiq amerikalik ishbilarmonlar hamrohlik qilmoqda.
«Hozirgina Tramp maʼmuriyatining mamlakatimiz uchun iqtisodiy imkoniyatlarini taʼminlashni davom ettirish maqsadida Oʻzbekistonga safarimni boshladim», deya yozgan uning oʻzi X ijtimoiy tarmogʻidagi sahifasida.
U safarga chiqishdan oldin aeroportda jurnalistlar bilan muloqot qildi va Markaziy Osiyoga tashrifi sabablari haqidagi savolga ham javob berdi.
«Bu shu yetakchilar uchun maʼqul kelgan vaqt boʻldi. Bu yerda gap faqat Oʻzbekiston haqida emas, Markaziy Osiyoning boshqa toʻrtta mamlakati haqida ham ketmoqda», – dedi u bunga javoban.
Rubio global inqirozlar tufayli muhim strategik tashriflar ortga surilib ketishi, biroq Vashington hamkor mamlakatlar bilan munosabatlarni rivojlantirishga alohida eʼtibor qaratayotganini taʼkidlagan.
«Bu juda muhim munosabatlar. Qayerdadir inqiroz, muammo chiqsa yoki konferensiya boʻlsa, hamisha oʻsha yerga shoshilamiz va oqibatda strategik tashriflarimiz bundan aziyat chekadi. Lekin munosabatlarimizni mustahkamlashni istaganimiz uchun borgimiz keladigan mamlakatlar ham bor. Bir necha hafta oldin Gretsiyaga, undan oldin Lotin Amerikasiga, endi esa Markaziy Osiyoga», – degan u.
Samarqandda 19-oktabr kuni «S5+1» formatida Markaziy Osiyo mamlakatlari va AQSH tashqi siyosiy idoralari rahbarlarining uchrashuvi boʻlib oʻtadi.
Uchrashuvda Oʻzbekiston, Qozogʻiston, Qirgʻiziston, Tojikiston va Turkmaniston tashqi ishlar vazirlari hamda AQSH davlat kotibi Marko Rubio ishtirok etadi.
Shu kuni Oʻzbekiston TIV rahbari Baxtiyor Saidov va Marko Rubio ikki mamlakat oʻrtasidagi kengaytirilgan strategik sheriklik muloqotining birinchi davrasini oʻtkazadi.
Tomonlar strategik sheriklikni chuqurlashtirish, siyosiy, savdo-iqtisodiy va investitsiyaviy hamkorlikni kengaytirish hamda mintaqaviy va xalqaro masalalarni muhokama qiladi.
Shuningdek, AQSH va Markaziy Osiyo mamlakatlari ishbilarmon doiralari vakillari ishtirokida uchrashuvlar oʻtkazilishi rejalashtirilgan.
Samarqanddagi uchrashuvlardan soʻng AQSH Davlat kotibi Hindistonga yoʻl oladi.
