Eronning yangi mudofaa vaziri Mehrdod Axloqiy kim?

Xususan, Axloqiy Eronning yirik «Sijjil» va «Zulfiqor» ballistik raketalari oilasini kengaytirishda rol oʻynagan. Shuningdek, u «Olmos» raketalari va «Yasin» bombalari kabi yuqori aniqlikda boshqariladigan qurollarni rivojlantirishda ham ishtirok etgan.

U kosmik raketa-tashuvchilar, tadqiqot raketalari hamda Semnondagi Imom Xumayniy kosmik markazi bilan bogʻliq infratuzilma boʻyicha ham tajribaga ega. Bularning barchasi Eronning Isroil va AQShga qarshi urushlarida muhim unsur boʻlgan.

Eron urushning yangi fazasiga tayyorlanmoqda

Eron Mudofaa vazirligi Axloqiyning tayinlanishini, avvalo, mamlakatning qurol salohiyatini oshirish zarurati bilan izohlamoqda. Oktabr oyida vazirlik oʻz bayonotida Axloqiyning nomzodi ilgari surilgani – Eronning strategik qurollar soni hamda sifatini oshirish ehtiyojini aks ettirishini aytgandi.

Axloqiy oʻzi esa oktabrda parlamentdagi chiqishida yuqori harbiy qoʻmondonlar bilan uchrashganini aytdi. Ular orasida Muhofizlar korpusi bosh qoʻmondoni, brigada generali Ahmad Vohidiy ham boʻlgan. Vazirning soʻzlariga koʻra, bundan maqsad qoʻmondonlarning urush davomidagi va undan keyingi ehtiyojlarini yaxshiroq tushunish boʻlgan.

Al Jazeera’ga koʻra, Axloqiy mudofaa vaziri sifatida bir qator yoʻnalishlarni ustuvor deb biladi. Bular:

• harbiy-sanoat rivojini jadallashtirish;
• havo hujumidan mudofaa;
• davlat va xususiy sektor kompaniyalari yordamida yangi paydo boʻlayotgan texnologiyalarni joriy etish;
• qurolli kuchlar xizmatchilari farovonligini yaxshilash;
• xalqaro harbiy hamkorlikni rivojlantirish.

Shu vaqtgacha AQSH prezidenti ham, boshqa rasmiylari ham Eronning harbiy-sanoat quvvatlarining katta qismini yoʻq qilganini bir necha bor daʼvo qilgan. Biroq Tehron AQSH va Isroil bombalari yetib bora olmaydigan joylarda hamon sezilarli hujum va mudofaa imkoniyatlariga ega ekanini aytib kelmoqda. Eron bu qurollar oʻzining yangi urush tajribasi asosida takomillashtirilganini ham qatʼiy taʼkidlagan.

Bir necha kun oldin AQSH maʼmuriyati Eronning yadroviy va energetika infratuzilmasiga qarshi «barcha bombalarning onasi»ni qoʻllash bilan tahdid qildi. «Barcha bombalarning onasi» – GBU-43/B MOAB bombasiga berilgan norasmiy nom. Uning ogʻirligi taxminan 9,8 tonna boʻlib, AQSH arsenalidagi eng kuchli noyadroviy bombalardan biri hisoblanadi.

Axloqiy tayinlangan kuni mudofaa vaziri sifatida bergan ilk izohlarida Tramp maʼmuriyatiga qarata kesatiq qildi. «Biz tayyorgarlik koʻrib qoʻyganmiz va ishimizni xotirjam davom ettirmoqdamiz», dedi u jurnalistlarga. «AQSH prezidenti oʻz kuchlarini mintaqamizdan butun holda olib chiqib ketish haqida oʻylashi kerak. Agar u bitta bomba tashlasa, qancha askarini gorizontal holatda evakuatsiya qilishga majbur boʻlishini koʻrishi kerak». Bu bilan u koʻplab amerikalik askarlar oʻldirilishi yoki yarador boʻlishiga ishora qildi.