Rossiyaning «Skolkovo» (Moskva) boshqaruv maktabi Sogʻliqni saqlashni rivojlantirish markazi negizida uzoq umr koʻrish laboratoriyasi tashkil etildi.
«Vedomosti» nashrining yozishicha, u yerda umr koʻrish davomiyligi ortishining sogʻliqni saqlash tizimi, bozorlar, mehnat faoliyati va davlat siyosatiga taʼsiri oʻrganiladi. Olingan maʼlumotlar asosida tadqiqotchilar keksalarning hayot sifatini oshirishga qaratilgan boshqaruv yechimlarini taklif etadi.
MDU Tibbiyot ilmiy-taʼlim instituti direktori, Vladimir Putinning qizi Mariya Voronsova «Skolkovo»dagi forumda soʻzga chiqib, ilm-fan inson umrini «tabiatan berilgan 85–90 yoshlik salohiyat»dan ortiqroq uzaytirish masalasida hozircha u qadar ilgarilab ketmaganini aytdi. Uning soʻzlariga koʻra, qarilikning kasallik deb hisoblanmasligi tadqiqotchilar yoʻlidagi toʻsiqlardan biridir, zero tashxis qoʻyilmas ekan, dori vositalarining klinik sinovlarini oʻtkazib boʻlmaydi. Shu bilan birga, Voronsovaning taxminiga koʻra, 10–20 yildan soʻng «oʻlim oldidagi umumbashariy qoʻrquv» sogʻliqni saqlash sohasi mutasaddilarini ushbu muammoni hal etishga undaydi.
2025-yilda Voronsova hujayralar yangilanishi va faol uzoq umr koʻrishni oʻrganish laboratoriyasi uchun Rossiya ilmiy jamgʻarmasidan 30 mln rubl miqdorida grant olgan edi.
2026-yil may oyida The Wall Street Journal nashri Rossiya hukumati «Salomatlikni asrashning yangi texnologiyalari» milliy loyihasi doirasida qarishga qarshi kurashish boʻyicha 26 mlrd dollarlik keng koʻlamli dasturni - jumladan, aʼzolarni bioprinterda chop etish, mitti choʻchqalar ishtirokidagi ksenotransplantatsiya va gen terapiyasini moliyalashtirayotgani haqida yozgan edi.
Xabar qilinishicha, dasturga Putinga yaqin shaxslar: uning qizi, davlat genetik loyihalari uchun masʼul endokrinolog Mariya Voronsova hamda Kurchatov instituti rahbari, Putinning doʻsti, bankir Yuriy Kovalchukning akasi, fizik Mixail Kovalchuk bosh-qosh boʻlmoqda. Katta Kovalchukni Kremlning uzoq umr koʻrish dasturining gʻoyaviy meʼmori deb atashadi: uning taʼkidlashicha, ilm-fan tez orada inson tana aʼzolarini «cheksiz taʼmirlash va almashtirish» imkonini beradi.
