Bugatti kompaniyasi La Maison Pur Sang dasturi doirasida noyob Veyron Grand Sport Vitesse giperkarini qayta tikladi. Bu nusxa kuzovining noodatiy bezagi bilan ajralib turadi.
Anʼanaviy boʻyoq oʻrniga Bugatti yuzasi koʻzgudek silliqlangan alyuminiydan foydalandi. Kuzov qismlarini tayyorlash uchun kompaniya ogʻirligi 20 tonnagacha boʻlgan alyuminiy xomashyolaridan foydalandi.
Alvon rangli charm bilan qoplangan salon rodsterning tashqi koʻrinishini toʻldirib turadi. Bezakda uglerod tolali ochiq elementlar va qoʻl mehnati bilan yaratilgan detallardan ham foydalanilgan.
Ishlab chiqarilganidan oʻn yildan koʻproq vaqt oʻtgach, avtomobil Bugatti tarixiy modellarini restavratsiya qilish va saqlab qolishga qaratilgan La Maison Pur Sang dasturida ishtirok etish uchun zavodga qaytdi. Mutaxassislar avtomobilning haqiqiyligini tekshirdi, zarur tiklash ishlarini olib bordi va dastlabki holatiga qaytardi.
Ishlar yakunlangach, Veyron giperkari maxsus sertifikatni oldi va Fransiya Riverasidagi yangi egasining kolleksiyasiga yoʻl oldi. Mutaxassislar uni kamida 3 million dollarga baholamoqda.
Kompaniya yangi xaridorning ismini rasman oshkor qilmadi. Biroq Monako koʻchalarida ushbu gʻayrioddiy Veyron rulida Formula-1 poygalarining ikki karra chempioni Fernando Alonsoni koʻrishgan.
