Novorossiyskka 9-sentabrga oʻtar kechasi uchuvchisiz uchish apparatlari (BPLA) bilan hujum qilindi. Bu haqda shahar meri Andrey Kravchenko Telegram orqali maʼlum qildi.
Uning soʻzlariga koʻra, urib tushirilgan dronlarning parchalari korxonalar hududiga, shuningdek, turar joy binosi yaqiniga tushgan. Dastlabki maʼlumotlarda jabrlanganlar yoʻqligi aytilmoqda. Hodisa joylarida tezkor xizmatlar hujum oqibatlarini bartaraf etish bilan shugʻullanmoqda.
ASTRA nashrining ochiq manbalar asosidagi OSINT-tahliliga koʻra, zarbalardan soʻng Novorossiyskdagi mazut terminalida kuchli yongʻin boshlangan. Mazkur terminal Rossiyadagi eng yirik port tarkibiga kiruvchi Novorossiysk transport uzelining muhim korxonalaridan biri hisoblanadi.
Shuningdek, shaharning boshqa qismida ham yongʻin qayd etilgan. Guvohlardan biri uni videoga olgan. ASTRA maʼlumotiga koʻra, Volgogradskaya koʻchasida joylashgan koʻp qavatli turar joy binosida ham yongʻin chiqqan.
Novorossiysk Rossiya tashqi savdosi uchun strategik ahamiyatga ega port shaharlaridan biri boʻlib, uning porti Yevropadagi eng yirik portlar qatoriga kiradi. U orqali Rossiyaning jahon bozorlariga chiqariladigan neft, metall, konteyner yuklari va katta hajmdagi don mahsulotlari tashiladi.
Maʼlumotlarga koʻra, Rossiya don eksportining uchdan bir qismigacha Novorossiysk porti orqali amalga oshiriladi. Bunga portning mamlakatning asosiy qishloq xoʻjaligi hududlariga yaqin joylashgani ham sabab boʻladi.
Avgust oyida ham Novorossiyskka zarbalar kuchayishi ortidan neft va don mahsulotlarini yuklash hamda joʻnatish jarayonlarida sezilarli uzilishlar kuzatilgan edi.
