Visual Capitalist Xalqaro valyuta jamgʻarmasining 2026-yil oktabrdagi «Jahon iqtisodiyoti istiqbollari» hisoboti prognozlari asosida eng yirik iqtisodiyotlarni taqqoslagan. Infografikada 20 ta mamlakatning nominal yalpi ichki mahsuloti - YAIM hamda xarid qobiliyati pariteti boʻyicha koʻrsatkichlari keltirilgan.
Nominal YAIM mamlakatda yaratilgan mahsulot va xizmatlar qiymatini bozordagi valyuta kursi orqali dollarga aylantirib hisoblaydi. Xarid qobiliyati pariteti esa mamlakatlar oʻrtasidagi narxlar farqini inobatga oladi: bir xil mablagʻ turli davlatlarda qancha tovar va xizmat sotib olishga yetishini taqqoslaydi.
Nominal hisobda AQSH iqtisodiyoti 2026-yilda 32,6 trillion dollarga, Xitoyniki esa 21,5 trillion dollarga yetishi prognoz qilingan.
Xarid qobiliyati pariteti boʻyicha esa Xitoyning YAIM 44,6 trillion xalqaro dollarga baholanmoqda. Bu AQSH koʻrsatkichidan taxminan 37 foiz yuqori. Xitoy ushbu hisoblash usuli boʻyicha AQShdan ilk bor 2014-yilda oʻzib ketgan.
Ikkala reytingda ham keltirilgan mamlakatlar orasida eng katta oʻrin farqi Indoneziyada kuzatiladi. U nominal YAIM boʻyicha 17-oʻrinda boʻlsa, xarid qobiliyati hisobga olinganda yettinchi oʻrinni egallaydi. Bu holda Indoneziya Kanada, Fransiya va Buyuk Britaniya kabi yirik iqtisodiyotlardan yuqorida turadi.
Hindistonning oʻrni ham sezilarli oʻzgaradi. Mamlakat nominal reytingdagi oltinchi oʻrindan xarid qobiliyati boʻyicha uchinchi oʻringa chiqib, Germaniya, Yaponiya va Buyuk Britaniyani ortda qoldiradi.
Hindiston YAIM xarid qobiliyati pariteti boʻyicha 19,2 trillion xalqaro dollarga baholangan. Germaniyada bu koʻrsatkich 6,6 trillionni tashkil etadi. Yaʼni ushbu usulda Hindiston iqtisodiyoti Germaniyanikidan qariyb uch baravar katta.
Rossiya esa nominal YAIM boʻyicha sakkizinchi, xarid qobiliyati boʻyicha toʻrtinchi oʻrinda qayd etilgan. Ikkinchi hisoblash usulida uning iqtisodiyoti 7,5 trillion xalqaro dollarga baholanib, Yaponiya va Germaniyadan yuqorida joylashgan.
Bu oʻrinlar farqi mamlakat iqtisodiyoti qisqa vaqtda keskin oʻsganini anglatmaydi - bir yil uchun ikki xil oʻlchov qoʻllanmoqda. Shuningdek, iqtisodiyotning umumiy hajmi aholi jon boshiga toʻgʻri keladigan daromad yoki turmush darajasi bilan bir xil koʻrsatkich emas.
Keltirilgan raqamlar 2026-yilning yakuniy natijalari emas, Xalqaro valyuta jamgʻarmasining prognozlaridir.
