DW xabariga koʻra, Mers bu haqda 21-oktabr kuni Berlindagi Berlin Global Dialogue iqtisodiy forumida gapirgan.
«Biz Ukrainani bu urushni choʻzish uchun qoʻllab-quvvatlayotganimiz yoʻq. Ammo Ukrainaning kapitulyatsiyasi, ayniqsa, soʻzsiz taslim boʻlishiga yoʻl qoʻyib boʻlmaydi. Chunki bu barchamizning taslim boʻlishimizni anglatadi», - degan kansler. Uning soʻzlarini Reuters agentligi keltirgan.
Mers Rossiya tomonidan tarqatilayotgan dezinformatsiya va gibrid hujumlarni Germaniya xavfsizligi uchun eng katta tahdid deb atagan. U Moskvani sovuq urush tugaganidan keyin shakllangan siyosiy tartibga qarshi hujum qilishda ayblagan.
«Hozir meni eng koʻp tashvishlantirayotgan narsa iqtisodiyotimiz ham, AQSH ham, Xitoy ham emas, balki Rossiyaning jamiyatimizga taʼsiridir», - degan Germaniya hukumati rahbari.
Uning soʻzlariga koʻra, gap qoʻporuvchilik harakatlari, aloqa tizimlariga gibrid hujumlar va Germaniyadagi vaziyatni beqarorlashtirishga urinishlar haqida ketmoqda. Kansler bunday hujumlar har kuni sodir boʻlayotganini, ammo mamlakatda tahdid koʻlami hali ham yetarlicha baholanmayotganini aytgan.
Avvalroq Ukraina prezidenti Volodimir Zelenskiy AQSH prezidenti Donald Tramp maʼmuriyatining soʻnggi harakatlarini Kiyevni taslim boʻlishga undashga oʻxshatgan edi.
18-oktabr kuni Bloomberg agentligiga bergan intervyusida Zelenskiy Ukrainani kapitulyatsiyaga koʻndirishga qaratilgan qadamlar tashlangan, deb hisoblashini bildirgan. Biroq u buni amerikalik hamkorlarning aniq maqsadi deb atashdan tiyilgan.
«Amerikalik hamkorlarimiz urushni Ukraina hisobiga tezroq tugatish mumkin, deb oʻylayotganiga ishongim kelmaydi. Ammo bu shunday koʻrinmoqda», - degan Ukraina prezidenti.
Tramp esa, oʻz navbatida, Zelenskiyni urushni tugatishni istamayotganlikda ayblab, unga muzokaralarni boshqa birovga topshirishni tavsiya qilgan.
