«Toshkent shahar yoʻlovchi tashishni monitoring va nazorat qilish» davlat muassasasi xabariga koʻra, voqea 15-avgust kuni Chilonzor tumanida oʻtkazilgan nazorat reydi vaqtida sodir boʻlgan.
Nazoratchilar avtobusdan bekatga tushgan M.M.dan yoʻl haqi toʻlanganini tasdiqlovchi hujjatni koʻrsatishni soʻragan. Muassasa maʼlumotiga koʻra, yoʻlovchi turli vajlarni keltirib, nazoratchi talabini bajarmagan va qarshilik koʻrsatgan.
Uning shaxsiga aniqlik kiritish jarayonida yoʻlovchi janjal chiqarib, nazoratchiga kuch ishlatishga uringan. Holat bodi kamera orqali qayd etilgan.
Mazkur ish 24-sentabr kuni jinoyat ishlari boʻyicha Chilonzor tuman sudida ochiq sud majlisida koʻrib chiqilgan. Sud M.M.ga uch sutka maʼmuriy qamoq jazosi tayinlagan.
Muassasa yoʻlovchilar avtobusga chiqishi bilan yoʻl haqini toʻlashi shartligini eslatgan. Xabarda qayd etilishicha, toʻlovni amalga oshirmagan yoʻlovchilar chiptasiz harakatlanayotgan deb hisoblanadi va ularga Maʼmuriy javobgarlik toʻgʻrisidagi kodeksning 144-moddasi 5-qismi asosida jarima qoʻllanadi.
Shuningdek, muassasa nazoratchilarga hujum qilish, zoʻravonlik bilan tahdid qilish va ularni haqoratlash qonunchilikda belgilangan javobgarlikka sabab boʻlishini taʼkidlagan.
