Fransiyada superkambek, Turkiya quyi ligaga tushib ketmoqda
|12:067 68013 min
Fransuzlar Belgiyaga qarshi oʻyinda 77-daqiqagacha ortda borayotgandi, keyin 13 daqiqa ichida 4 ta gol urishdi. Turklar qatorasiga toʻrtinchi oʻyinda ham yutqazdi.
Millatlar ligasida yana 4 guruhda 4-tur uchrashuvlari boʻlib oʻtdi.
Millatlar ligasi terma jamoalar bosh murabbiylari uchun tajriba maydonchasi vazifasini oʻtashda davom etmoqda. Guruh peshqadamligi uchun kechgan bahsda ikki murabbiy ham hech kim tanimaydigan darvozabonlarni maydonga tushirdi: fransuzlar darvozasini «Tuluza»dagi Rest, belgiyaliklarnikini «RB Leypsig» aʼzosi boʻlgan Vandevordt qoʻriqladi.
Zidan shogirdlari darhol tashabbusni qoʻlga oldi va toʻp yoʻqotilishi bilan kuchli pressing uyushtirdi. Mark van Bommel jamoasi esa quyi blokda himoyalandi. Mehmonlar faqat birinchi boʻlim oʻrtalarida raqib jarima maydoni ichkarisida toʻp bilan muomila qildi va darhol xavfli vaziyat yuzaga keldi. Ammo Raskinning boshda yoʻllagan zarbasi biroz xato ketdi.
Fransuzlar esa butun boʻlim davomida vaziyatlardan foydalanishda oqsadi. Barkolya darvozabon bilan yakkama-yakka vaziyatdan ham foydalana olmadi. Tanaffus arafasida esa mehmonlar hisobda oldinga chiqib olishdi. Fransuzlarning pressingi muvaffaqiyatsiz chiqdi va Lavia maydonning ikkinchi qismidan turib toʻpni raqib himoyasi ortida yuzaga kelgan boʻsh hududga yetkazdi, Lukebakio ofsayd chizigʻida harakatlanib, toʻpga yetib bordi va darvozabonga imkon qoldirmadi.
Ikkinchi boʻlimda ham kartina oʻzgarmadi, mezbonlar kuchli bosim oʻtkazishdi, ammo himoyachilar va darvozabondan oʻta olishmadi. Natijada Zidan zaxira kuchlarini ishga solishga toʻgʻri keldi va birdaniga Olise, Sherki va da Kunya, keyinroq Due ham maydonda paydo boʻldi. Avvaliga Vandevordt seyv ijro etishda davom etdi, ammo Fransiya toʻrt daqiqa ichida oʻyinni butunlay oʻzgartirdi.
Due jarima maydoni tashqarisida toʻpni Da Kunyadan qabul qilib olgach, olis burchakka yerlatib zarba berdi va hisobni tenglashtirdi.
Mavzuga oid
Mehmonlar birinchi goldan oʻziga kelishga ulgurmasdan ikkinchisini ham qabul qilib olishdi. Bu safar Sherki Maykl Olisening uzatmasini golga aylantirdi.
Oʻyin oxirida uch daqiqa ichida Olise darvozaning turli burchaklariga zarba berib, dublni rasmiylashtirdi, unga ikki golida ham Due assistentlik qildi. Fransuzlar zarbalar soni boʻyicha yaqqol ustunlikka erishdi (23:5, darvoza sohasiga toʻgʻri borgan zarbalar boʻyicha 8:2) va bu yakuniy hisobda ham oʻz aksini topdi – 4:1.
Zinedin Zidan boshqaruvidagi toʻrt oʻyinda Olise 4+2 koʻrsatkichini qayd etdi. U joriy yil boshidan buyon terma jamoada gol+pas boʻyicha 17 ochko jamgʻarib ulgurgan. Noyabrdagi oʻyinlarda esa Tiyerri Anrining 2023-yilgi rekordini (19) ortda qoldirishi mumkin.
Turkiya tarkibida shusiz ham muammolar koʻp edi, Bolonyadagi oʻyinda esa sariq kartochkalar soni ortib ketgani tufayli Arda Guler va Barish Yilmaz ham oʻynay olmadi. Vinchenso Montella oʻz odatiga koʻra tajovuzkor oʻyin koʻrsatdi va raqibni qattiq ter toʻkishga majbur etdi, ammo yana himoyada ishonchsiz harakat qildi. Boʻlim oʻrtalaridan oʻtganda Skamakka jarima maydoni markazida toʻp uchun kurashda yutib chiqdi va darvozabonga ham imkon qoldirmadi.
«Skuadra adzurra»da hisobdagi farqni oshirish uchun imkoniyatlar boʻldi, masalan, Dumbiya yakkama-yakka vaziyatga ega boʻldi. Ikkinchi boʻlimda esa turklar hisobni tenglashtirib qoʻyishdi. Boshqa yetakchilar yoʻqligida sardorlik bogʻichi bilan tushgan Chelik qanotdan darvozabon maydonchasiga uzatma berdi, toʻp Elmaliga tekkan holda hisobni tenglashtirgan Aral Shimshirga kelib tushdi. Ammo hisobdagi tenglik ham uzoq saqlanib qolmadi. Ikkinchi boʻlimda zaxiradan tushgan Kalafiori jarima zarbasi ijro etilishi vaqtida barchadan ildamroq harakat qilib, gʻalaba golini urdil.
Ikkinchi boʻlim davomida Dumbiya yana bir qulay vaziyatni yoʻqqa chiqardi. Ammo uning baxtiga toʻp italyanlarda qoldi va hujumning ikkinchi tempida Pio Espozito darvozani ishgʻol etdi va bu uning terma jamoadagi 7-goli boʻldi. Unga qadar «Skuadra adzurri» safida 21 yoshgacha buncha golni faqat Juzeppe Meatssa urgandi. Bu gʻalabadan keyin Italiya Belyagiyani ortda qoldirib, guruh jadvalida ikkinchi oʻringa koʻtarildi. Guruhdagi toʻrt oʻyinda ham yutqazgan Turkiya esa keyingi ikki tur natijalaridan qatʼi nazar pley-offga chiqmaydi va B divizionga tushib ketadi.
12-noyabr. Turkiya – Belgiya, Italiya - Fransiya. 15-noyabr. Belgiya – Italiya, Fransiya - Turkiya.
Inqiroz koʻchasiga kirib qolgan Ruminiya ketma-ket toʻrtinchi oʻyinda ham yutqazdi. Shvedlarga qarshi oʻyinda birinchi boʻlim boshlarida oʻtkazib yuborilgan gol yagonaligini saqlab qoldi. 13-daqiqada Bergval maydon markazida toʻpni raqibdan olib qoʻydi va hujum boshlab berdi, hujumni esa darvozabon hududida boʻsh qoldirilgan Viktor Yokeresh gol bilan yakunladi. Bu mavsum «Arsenal»ning asosiy tarkibidan tushib qolgan ushbu hujumchi xalqaro tanaffusni aʼlo darajada oʻtkazdi va toʻrt oʻyinda toʻrtta gol urdi, bundan tashqari, Millatlar ligasida qatorasiga yetti oʻyinda gol urgan holda rekord oʻrnatdi.
Mezbonlar ikkinchi boʻlimda oʻziga keldi va bir necha yaxshi vaziyatlarga ega boʻldi. Ammo skandinavlar gʻalabani saqlab qolishdi va guruh peshqadamligini mustahkamladi. Endi Shvetsiya pley-offga chiqishi uchun keyingi ikki turda bir ochko olishi ham yetarli boʻladi.
Parallel uchrashuvda shvedlarning guruh gʻolibligi uchun raqobatchisi Polsha minimal hisobda yutqazdi. Ikkinchi boʻlim boshida Xaris Tabakovichning goli ofsayd tufayli bekor qilingandi, ammo bosniyaliklar baribir oʻyin oxirida oʻz maqsadiga erishdi. 84-daqiqada Bednarek jarima maydoni ichida raqib futbolchisini qoʻllari bilan yiqitdi, belgilangan penaltini esa Ivan Bashich aniq ijro etdi. Butun oʻyin davomida darvoza sohasiga toʻgʻri borgan birgina zarba Bosniyaning gʻalabasi uchun yetarli boʻldi.
14-noyabr. Ruminiya – Polsha, Shvetsiya – Bosniya. 17-noyabr. Bosniya – Ruminiya, Polsha – Shvetsiya.
Shimoliy Irlandiya oʻz maydonida Gurjistonni magʻlub etolmadi, holbuki britanlar gʻalabaga juda yaqin edi. Oʻyindagi asosiy epizod 81-daqiqada roʻy berdi: toʻp mehmonlar jarima maydonida uzoq qolib ketdi, bir marta darvoza toʻsiniga ham tegdi, lekin uni hech kim darvoza toʻriga kiritib yubora olmadi. Keyin esa vaziyatga VAR aralashdi va penalti belgilandi: bu talatoʻpda Nodar Lominadze Ruayri Makkonvilning boshiga zarba berib yuborgani maʼlum boʻldi.
Georgiy Mamardashvili esa Ayzek Praysning 11 metrdan yoʻllagan zarbasini qaytardi va jamoasini magʻlubiyatdan saqlab qoldi.
Ukraina – Vengriya 1:2 Gollar: M. Tot, 52 (0:1). Yaremchuk, 83 (1:1). Chinger, 85 (1:2) Ukraina: Trubin, Mixavko, Sarapiy, Zabarniy, Krupskiy, Nazarina (Varfolomeyev, 86), Ocheretko (Pixalenok, 70), Veleten (Xlan, 60), Ponomarenko (Yaremchuk, 60), Sigankov, Krasnopir (Vanat, 60) Vengriya: B. Tot, Nad, Chinger, Orban, Oshvat, Soboslai (Chenvay, 87), Shefer (R. Tot, 72), A. Tot (Syuch, 62), Vitalish, Lukach (Yurek, 61), M. Tot (Salai, 72) Ogohlantirishlar: Nazarina, 20 – Lukach, 55. R. Tot, 78
Oʻtgan turda Shimoliy Irlandiya maydonida yirik hisobda yutqazgan (0:3) Ukraina Vengriyada uy maqomida oʻtgan oʻyinda Slovakiyadan ham magʻlub boʻldi – 1:2. Oʻyinda hisobni Milan Tot ochdi: u jarima maydoniga yorib kirdi va Dmitro Riznikning qoʻpol xatolaridan keyin asosiy tarkibga qaytarilgan Anatoliy Trubinni oeiz qoldirdi. 83-daqiqada Roman Yaremchuk burchak zarbasidan keyin boshda gol urib hisobni tenglashtirgandi, ammo koʻp oʻtmay Mark Chinger slovaklarning tezkor qarshi hujumida gʻalaba golini urdi.
14-noyabr. Gurjiston – Vengriya, Shimoliy Irlandiya – Ukraina. 17-noyabr. Vengriya – Shimoliy Irlandiya, Ukraina – Gurjiston.
Armaniston Chernogoriyada golsiz durang qayd etdi. Oʻyinda yetarlicha golli vaziyatlar boʻlmadi va ikki jamoa ham zarbalar soni boʻyicha 10 talik nuqtaga yeta olmadi. Mezbonlar safida ikkinchi boʻlimda maydonga tushgan Stefan Lonchar esa Nareka Oganesyanga bergan zarbasi tufayli maydonni erta tark etdi.
Kipr uyda Latviya ustidan gʻalaba qozondi – 2:1. Oʻyinning ikkinchi boʻlimi boshida mehmonlar hisobni ochgandi: Eduards Dashkevichsning zarbasidan keyin toʻp himoyachilarga tekkan holda avvaliga ustunga, keyin darvoza toʻriga bordi.
Keyin esa mezbonlar kambek amalga oshirishdi. Avvaliga Ioannis Kosti darvozabonga podkat ishlatib, toʻpni olib qoʻydi va boʻsh darvozani ishgʻol etdi. Oʻyinga qoʻshib berilgan daqiqalarda kiprliklar gʻalaba golini ham urishdi – Markus Edvards jarima maydoni tashqarisidan aylanma zarba yoʻlladi. Golni nishonlash uchun maydonga zaxira futbolchilari ham chiqib kelishdi.
S ligasida guruh gʻoliblari toʻgʻridan toʻgʻri V ligasiga oʻtadi, ikkinchi oʻrin egalari V ligasi vakillariga qarshi oʻtish oʻyinlarida ishtirok etadi. Uchinchi va toʻrtinchi oʻrinlarni egallagan jamoalar esa S divizionda qolishadi.
Keyinroq ularga D ligasidagi olti jamoa qoʻshiladi (bu liga tugatilmoqda). May oyida UEFA Millatlar ligasida uch divizionlik (A, V, S) yangi tizimni tasdiqlagandi, yangi formatda 18 jamoa oltitadan uchta guruhga ajratiladi.
6-oktabr kuni Millatlar ligasida birinchi xalqaro tanaffus doirasidagi soʻnggi 10 oʻyin boʻlib oʻtadi. Tunda ikki markaziy oʻyin bor: Xorvatiya – Ispaniya va Angliya – Chexiya. Shuningdek, Shveysariya, Shotlandiya, Belarus, Qozogʻiston va boshqa jamoalar navbatdagi oʻyinlarida maydonga tushadi.
Millatlar ligasi guruh bosqichidagi oxirgi ikki tur 12-17 noyabr kunlarida oʻtkazilishi belgilangan.
