Ronaldu oʻrniga Ramush gol urmoqda, Irlandiya-Isroil oʻyinida yana mojaro
|12:22 / 05.10.202619 58711 min
Jahon chempionatida shov-shuv koʻtargan Norvegiya ketma-ket uch bor yutqazib, soʻnggi oʻringa tushib ketdi, Erling Holand Portugaliyaga qarshi oʻyinni yakunlay olmadi; startdagi toʻrt oʻyinda faqat bir gʻalabaga erishgan Klopp Germaniyasi ham guruhda qolib ketishi mumkin.
Portugaliya ikkinchi oʻzaro oʻyinda ham Norvegiyadan ustun keldi – 2:1. Skandinavlar ustozi Stole Solbakken oldingi oʻyinlarda qoʻpol xatolarga yoʻl qoʻygani uchun darvozabon Nyulandni almashtirgandi, ammo bu ham foyda bermadi. Holbuki Norvegiya Martin Edegorning uzatmasi va Ayer toʻp uchun kurashda yutib chiqib, fantastik zarbasi yoʻllashi orqali hisobda oldinga chiqib olishgandi, ammo portugallar kambek amalga oshirishdi. Hisob ochilganidan ikki daqiqa oʻtib Jorje Jezush shogirdlari aut ijrosi orqali raqibni hayron qoldirishdi: Mendesh toʻpni jarima maydoni ichkarisiga emas, tashqarida turgan Joau Kanseluga oshirdi, u esa toʻpni darvoza toʻqqizligiga aniq yoʻnaltirdi.
Norvegiyaliklarda ikkinchi boʻlimda hisobda oldinga chiqib olish uchun yaxshi imkoniyat yuzaga kelgandi, ammo Erling Holand Ruben Diash bilan toʻp uchun kurashda yutib chiqqanidan keyin yoʻllagan zarba darvoza sohasiga toʻgʻri bormadi. U ikkinchi boʻlim davomida tanasida noqulaylik his qildi va oʻzini almashtirishni soʻradi.
Portugaliya esa oʻz imkoniyatidan foydalandi: 79-daqiqada Vitinya toʻpni jarima maydonida oʻzini taklif qilgan Joau Felishga yetkazib berdi, u esa toʻpni bir teginishda qulayroq vaziyatda turgan Gonsalu Ramushga yetkazdi va Ronaldu oʻrniga asosiy forvardga aylangan futbolchi hujumni aʼlo darajada yakunladi. Statistikaga koʻra, ushbu futbolchi gol urgan oʻyinlarda Portugaliya gʻalaba qozonishi kafolatlangan (11 tadan 11 ta).
Oʻyin oxirida hakam ikki darvozaga ham bittadan penalti belgilamadi, Fransishku Konseysau esa hakam bilan tortishgani uchun bir daqiqa ichida ikki bor sariq kartochka olib maydonni tark etdi. Lekin Norvegiya qolgan daqiqalarda son jihatdan ustunlikdan foydalana olmadi va guruhda soʻnggi oʻringa tushib ketdi. Portugaliya Jorje Jezush boshqaruvidagi toʻrtinchi oʻyinda ham gʻalaba qozondi, shundan uchtasida Krishtianu Ronalduning xizmatlariga ehtiyoj sezilmadi.
Parallel oʻyinda esa uelsliklar darvozaboni Uord qahramondan antiqahramongacha boʻlgan yoʻlni bosib oʻtdi. Birinchi boʻlim boshidayoq jarohat tufayli jamoa sardori Heybergsiz qolganiga qaramay, daniyaliklar faolroq boʻlishdi va ketma-ket vaziyatlar yaratishdi. Uord oʻyin davomida devordek turdi, ikkinchi boʻlim davomida Hoylund va Isaksen yaqin masofadan turib uni dogʻda qoldira olmadi.
Ammo aynan u himoyadan chiqishda xato pas berganidan keyin yakkama-yakka vaziyatga chiqib kelgan raqibga fol ishlatdi, belgilangan penaltini esa Hoylund aniq ijro etib, oʻyin taqdirini hal qildi.
Guruhda dastlabki ikki oʻrin egalari pley-offga chiqdi, portugallar 4 oʻyinda 12 ochko jamgʻardi va qolgan ikki turdagi natijalardan qatʼi nazar, ikkinchi oʻrindan pastga tushib ketmaydi. Uchinchi oʻrin egasi (Uels yoki Norvegiya) V ligasidan uchinchi oʻrin bilan chiqqan jamoaga qarshi oʻtish oʻyinida ishtirok etadi.
14-noyabr. Norvegiya – Uels, Portugaliya – Daniya. 17-noyabr. Daniya – Norvegiya, Uels – Portugaliya.
Yurgen Kloppning tarkib bilan qilgan tajribasi oʻzini oqlamadi. Oʻtgan yakshanba kuni Augsburgdagi oʻyinda Gretsiya nemislarning butunlay boshqa tarkibini magʻlub etib qaytgandi. Afinadagi oʻyinda nemislar butunlay boshqa tarkib bilan harakat qildi, ammo bu safar ham greklarni magʻlub etolmadi – 0:0.
Birinchi boʻlimda Yonatan Burkardt Derri Sherhantning pasidan darvozani ishgʻol etgandi, ammo gol inobatga olinmadi – Tom Bishof hujumning boshlangʻich qismida toʻpni qoʻli bilan oʻynagani maʼlum boʻldi. Nemislar birinchi boʻlimda zarbalar soni boʻyicha yaqqol ustunlikka ega boʻldi (13:1), ammo ikkinchi boʻlimda darvoza sohasiga borgan atigi birgina zarba yoʻllay oldi.
Yurgen Klopp davrida Germaniya hozircha toʻrt oʻyinda atigi besh ochko jamgʻardi va Gretsiya darvozasiga 180 daqiqada yoʻl topa olmadi.
Gretsiya Niderlandiya va Germaniya bor guruhda 4 turdan keyin ikkinchi oʻrinni egallab turibdi. Agar Germaniya qolgan ikki turda vaziyatni oʻnglay olmasa, uchinchi oʻrinda qolishi va A ligada qolish uchun oʻtish oʻyinlarida maydonga tushishi kerak boʻladi.
Niderlandiya uyda guruh autsayderi Serbiyani magʻlub etdi – 2:1. Shu kuni terma jamoadagi yubiley 100-oʻyinida maydonga tushgan Virjiyl van Deyk birinchi golda ishtirok etdi: Ten Kopmeyners jarima zarbasini ijro etganida jamoa sardori darvozabon Vanya Milinkovich-Savichni chalgʻitib berdi. Biroz oʻtib «Anderleht»ning 19 yoshli forvardi Mixaylo Svetkovich qanotdan oshirilgan toʻpni boshda darvozaga yoʻllab, muvozanatni tikladi. Shundan keyin serblar tashabbusni qoʻlga olishdi va qator xavfli vaziyatlar yaratishdi, ammo hujumlarni yakunlashda aniqlik yetishmadi.
Mezbonlar esa faqat 71-daqiqaga kelib vaziyatni oʻzgartira oldi. Ruben van Bommel ikkinchi boʻlimda zaxiradan tushgan Joshua Zirkzeni qulay vaziyatga chiqardi: «MU» hujumchisi shunchaki toʻpga teginib qoʻyishi yetarli boʻldi. Oʻyin oxirida serblar kuchli pressing uyushtirishdi, hatto darvozabon Milinkovich-Savich bir necha daqiqani raqib jarima maydonida oʻtkazdi, ammo hisobni tenglashtirishning imkoni boʻlmadi. Yakunda Niderlandiya birinchi oʻringa chiqib oldi, Serbiyada hamon birorta ochko yoʻq.
Irlandiya – Isroil 1:1 Gollar: Perrott, 39 – penalti (1:0). D. Perets, 47 (1:1) Irlandiya: Kelleher, OʼBrayen, Skeyls, Dann, Molumbi, Koventri (Laval, 84), Menning (Began, 84), Nayt, Ida (Ogbene, 69), Moylan (Vata, 69), Perrott Isroil: Sur, Nahmias, Stoinov, Fayngold (Dasa, 78), Revivo, Abada (Solomon, 72), E. Perets (Shua, 78), Azulay (Gandelman, 58), Gluh, D. Perets, Turgeman (Levi, 58) Ogohlantirishlar: Skeyls, 44 – Nahmias, 29. D. Perets, 38. Levi, 90
Irlandiya va Isroil oʻrtasida Serbiyada boʻlib oʻtgan ikkinchi oʻyinda kuchlar teng keldi. Birinchi boʻlim oxirlarida Jimmi Dann Dor Peretsning folidan keyin penalti ishladi, irlandlar toʻpurari Troy Perrott esa 11 metrdan aniq zarba berdi. Ikkinchi boʻlim boshida Perets oʻz xatosini toʻgʻrilab, hisobni tenglashtirdi.
Oʻyinda shu hisob saqlanib qoldi. Irlandiya mediasi yozishicha, tanaffusda jamoalar oʻrtasida kichik mojaro roʻy bergan, tortishuv chogʻida isroillik futbolchilardan biri Irlandiya milliy jamoasining jismoniy tayyorgarlik boʻyicha murabbiyi Demen Doylning yuziga tupurib yuborgan.
Oʻyin yakunlanganidan keyin esa futbolchilar avvalgi oʻyinda boʻlgani kabi bir-biriga qoʻl berishmagan.
Kosovo – Avstriya 1:1 Gollar: Asllani, 70 (1:0). Lang, 85 (1:1) Kosovo: Saipi, I. Krasnichi, Rachi, Dellova, Xoʻja (Demaku, 81), Avdullahu, Gallapeni, Voyvoda, Zabergya (Rashitsa, 66, Korenitsa, 88), Jegrova (E. Krasnichi, 81), Murichi (Asllani, 66) Avstriya: A. Shlager, Danso, Baher, Laymer, Posh, K. Shlager, Zayvald (Veber, 77), Shmid (Lang, 62), Prass (Kalayjich, 62), Vimmer (Gryull, 62), Gregorich Ogohlantirish: Dellova, 90
Kosovo va Avstriya oʻyini durang hisob bilan yakunlandi. 70-daqiqada Fisnik Aslani jarima maydoni tashqarisidan aniq zarba yoʻllagandi, 15 daqiqa oʻtib Kristof Lang boshda yoʻllagan zarbasi bilan muvozanatni tikladi. Ushbu guruhda birinchi oʻrin egasi A ligasiga oʻtadi, ikkinchi oʻrin sohibi – A ligasidagi uchinchi oʻrin egalaridan biriga qarshi oʻtish bahsida ishtirok etadi, uchinchi jamoa V ligada qoladi, toʻrtinchisi quyi divizionga tushib ketadi.
14-noyabr. Kosovo – Isroil, Avstriya – Irlandiya. 17-noyabr. Isroil – Avstriya, Irlandiya – Kosovo.
D ligasi, 1-guruh
Malta – Andorra 1:0 Gol: Teddi Teuma, 49 (1:0)
Malta oʻz maydonida Andorradan ustun keldi – 1:0. Ikkinchi boʻlim boshida Teddi Teuma Ilyos Shuarefni aldab oʻtdi va olis burchakni aniq nishonga oldi. Qolgan vaqt davomida orolliklar hisobdan kelib chiqib oʻynashdi – maltaliklar Andorraga hech qachon yutqazmagan, oʻzaro sakkiz oʻyindan yarmida gʻalaba qozongan.
Ozarboyjon uyda Litvadan ustun keldi – 1:0. Birinchi boʻlim oʻrtalarida «Saboh» yarimhimoyachisi Abdula Haybulayev urgan gol yagonaligini saqlab qoldi. Litvaliklar oʻyin oxirida hujumchi Armandas Kuchisning hakam bilan tortishuvidan keyin ozchilik ham boʻlib qolishdi.
Endi ushbu ikki jamoadan qaysi biri Lixtenshteynga koʻproq gol ura olsa, guruh gʻolibligini oʻz qoʻliga oladi. Ammo ushbu jamoada ham guruh peshqadamligi uchun imkoniyat saqlanib qolmoqda.
