«O‘zbekkino» milliy agentligi va xususiy kinostudiyalar hamkorligida Jahongir Ahmedovning «Islomxo‘ja» nomli ilk to‘liq metrajli badiiy-publitsistik filmi suratga olindi. Kinokartina tarixiy shaxs, XIX asrning oxiri – XX asrning boshlarida Xiva xonligida katta islohotlar o‘tkazgan ma'rifatparvar vazir Islomxo‘janing fojiaviy o‘limi haqida.
15 iyul kuni «Premier Hall» kinoteatrida film ijodkorlari va jurnalistlar bilan birgalikda matbuot anjumani hamda filmning yopiq taqdimoti bo‘lib o‘tdi. Anjumanda «O‘zbekkino» MA bosh direktori Furqat Zokirov o‘z fikrlarini bildirib o‘tdi.
«Bu yerga jurnalistlar, san'atshunoslarni yig‘ishimizdan maqsad film haqida keng jamoatchilik fikrini to‘g‘ri shakllantirishdir. Odatda, kinoprem'yeradan so‘ng tomoshabinlar fikri so‘raladi. Kimdir to‘g‘ri, xolis fikr bildiradi, yana kimdir baholay olmaydi. Bir necha kishining gaplari orqali auditoriya o‘zicha xulosa chiqaradi. Shu kabi noaniq tushunchalarning oldini olish maqsadida, filmni xalqqa taqdim etishdan oldin siz mutaxassislar, xolis baholovchilar hukmiga havola etishimiz kerak. Siz jamoatchilik fikrini shakllantirishda muhim bo‘g‘in vazifasini bajarasiz. Toki odamlar kinokartina haqida noxolis va noprofessional tushunchaga ega bo‘lmasin. Bunda to‘g‘ri axborot berish juda muhim hisoblanadi», deya uning so‘zlarini keltirmoqda «Kun.uz» muxbiri.
Shuningdek, tadbirda o‘zbek kinosida kechayotgan jarayonlar xususida ham batafsil ma'lumot berildi. Jumladan, «O‘zbekkino» MA tomonidan 2017-2018 yillarda turli mavzu va yo‘nalishlarda 64ta film suratga olingan. Shulardan 23tasi to‘liq metrajli, 4tasi qisqa metrajli, 26tasi hujjatli va 7tasi multiplikatsion filmlardir. «Hujjatli va xronikal filmlar kinostudiyasi» DUK tomonidan joriy yilning avgust oyi holatiga ko‘ra, 26 nomdagi tarixiy, iqtisodiy-ijtimoiy jarayonlarni yorituvchi, zamondoshlar haqida hikoya qiluvchi hujjatli filmlar suratga olinmoqda va ulardan 7tasi katta ekranlarda namoyish etildi.
«Islomxo‘ja» filmining o‘zbek kinotomoshabinlari uchun premerasi shu oy oxiriga mo‘ljallangan.
