Osiyo oʻyinlari kundaligi. Yana ikki oltin va boksdagi magʻlubiyatlar
|19:38 / 30.09.202623 5468 min
Dzyudo va yunon-rum kurashida dastlabki oltinlar qoʻlga kiritildi. Boks jamoasining uch nafar vakili esa yarimfinalda yutqazdi. Finalda Oʻzbekistondan faqat uch nafar bokschi boʻladi.
Foto: Milliy olimpiya qoʻmitasiFoto: Milliy olimpiya qoʻmitasi
Oʻzbekiston oltin medallar sonini 16 taga yetkazdi va eng yaqin taʼqibchisi Tailanddan uzoqlashishda davom etmoqda.
Oʻzbekiston delegatsiyasi aʼzolari 2026-yilgi Osiyo oʻyinlarining 11-kunida 12 sport turida ishtirok etishdi.
Kun davomida delegatsiya hisobiga yana 9 ta medal (2 ta oltin, 2 ta kumush va 5 ta bronza) qoʻlga kiritildi: medallarning barchasi dzyudo, yunon-rum kurashi va boksda qoʻlga kiritildi.
Dzyudo
Bugungi dasturda Oʻzbekiston dzyudo jamoasining 4 vakili ishtirok etdi va shundan uch nafari medal qoʻlga kiritdi.
Dastlab ayollar oʻrtasida 48 kilogrammgacha boʻlgan vazn toifasida Laziza Haydarova chorakfinalda yaponiyalik Kondo Mitsukiga qarshi gilamga chiqib, yutqazib qoʻydi. Yaponiyalik sportchi finalgacha yetib borgani (u shu vazn toifasi chempioni ham boʻldi) tufayli Haydarovada bronza uchun kurashish imkoniyati yuzaga keldi, ammo oʻzbekistonlik sportchi medal uchun oʻtish bahsida tojikistonlik Ahliya Moʻminovaga ham magʻlub boʻldi.
Ayollar oʻrtasida 52 kilogrammgacha boʻlgan vazn toifasida ishtirok etgan Siti Qadamboyeva esa Oʻzbekistonga navbatdagi oltin medalni olib keldi. U chorakfinalda qozogʻistonlik Meruyert Sarsenovani, yarimfinalda moʻgʻulistonlik Uranzaya Bayanmunkni, finalda esa Janubiy Koreya vakili Jang Seyunni magʻlubiyatga uchratdi.
Erkaklar oʻrtasida 60 kilogrammgacha boʻlgan vazn toifasida Samariddin Qoʻchqorov bronza bilan kifoyalandi.
U dastlabki bosqichda nepallik Vikasni ippon bahosi bilan magʻlub etdi, keyingi bosqichda Bahrayn nomidan qatnashgan Ruslan Poltoratskidan yuko bahosi bilan ustun keldi, ammo yarimfinalda yaponiyalik Hayato Kondoga vazari bahosi bilan yutqazdi. Medal uchun kurashda esa tojikistonlik Loyiq Kudbudinovdan vazari va yuko baholari evaziga ustun keldi.
Mavzuga oid
Erkaklar oʻrtasida 60 kilogrammgacha boʻlgan vazn toifasida qatnashgan
Abdurahim Nutfulloyev
esa kumush bilan qaytadigan boʻldi.
U dastlabki bosqichda filippinlik Keysey Nakanoni ippon bahosi bilan magʻlub etgandi, chorakfinalda xitoylik Huye Ziyangdan Vazari bahosi bilan ustun keldi, yarimfinalda janubiy koreyalik Kim Channeyongni yuko bahosi bilan taslim qildi, ammo finalda Moʻgʻuliston vakili Yolk Kazirbekka ippon bahosi bilan yutqazdi.
Yunon-rum kurashi
Oʻzbekiston yunon-rum kurashi jamoasi esa bugungi dasturda 3 nafar sportchi bilan ishtirok etdi va ularning barchasi medal qoʻlga kiritdi.
Amaldagi Osiyo va jahon chempioni hisoblangan Aytjan Xalmaxanov 67 kilogrammgacha boʻlgan vazn toifasida ishtirok etib, oʻz sovrinlari qatoriga Osiyo oʻyinlari gʻolibligini ham qoʻshib qoʻydi. U finalgacha yoʻlda xitoylik Ji Leng (9:0), saudiyalik Muntir Jandu (8:0) va qirgʻizistonlik Razzoq Beyshekeyev (5:0) toʻsigʻidan oʻtdi, oltin uchun kechgan qiyin bahsda esa yaponiyalik Kyataro Sogabeni ham magʻlub etdi (3:2).
87 kilogrammgacha boʻlgan vazn toifasida ishtirok etgan amaldagi Osiyo oʻyinlari gʻolibi Jalgasbay Berdimuradov bu safar bronza bilan kifoyalandi. U nimchorak finalda xitoylik Likui Shini (8:0) magʻlub etdi, chorakfinalda qirgʻizistonlik Asan Janishovga yutqazdi (4:0), medal uchun bahsda qozogʻistonlik Shamil Oʻjayevdan ustun keldi (9:1).
130 kilogrammgacha boʻlgan vazn toifasida Oʻzbekiston sharafini himoya qilgan rossiyalik Rafael Sitsuashvili nimchorak finalda Janubiy Koreya vakili Kim Minseokdan ustun keldi (1:1, oxirgi ballni olgan sportchi keyingi bosqichga chiqqan).
Chorakfinalda qozogʻistonlik Oʻljas Sirlibayni magʻlubiyatga uchratdi (2:1), yarimfinalda turkmanistonlik Aslan Agadadayev toʻsigʻidan oʻtdi (8:0), ammo hal qiluvchi bahsda eronlik Amin Mirzazodaga yutqazdi (1:3).
Boks
Oʻzbekiston boks jamoasining (ayollar va erkaklar) toʻrt nafar vakili bugun yarimfinalda jang qildi. Shundan uch nafari finalga chiqa olmadi va bronza bilan qaytadigan boʻldi.
Dastlab turnirda -51 kg vazn toifasida qatnashgan Feruza Kazakova yarim finalda amaldagi Olimpiada chempioni xitoylik Yu Vuga qarshi ringga koʻtarildi. U kuchli raqib bilan tengma-teng jang qildi, ammo yakunda hakamlar Kazakovaning magʻlubiyatini qayd etishdi (0:5).
Kazakova turnir davomida tailandlik Raksat Chutamat (5:0) hamda shimoliy koreyalik Kum Byol An ustidan (5:0) gʻalaba qozongandi, ammo endi bronza medali bilan kifoyalanadigan boʻldi.
Yarim finalda -60 kg vazn toifasida ringga chiqqan Sitora Turdibekova ham Olimpiada chempioni, tayvanlik Lin Yu Tingga yutqazdi (0:5) va turnirdagi ishtirokini bronza medal bilan yakunladi.
U bu bosqichgacha vetnamlik Ti Lin Ha (5:0) va moʻgʻulistonlik Namun Munkor (3:2) bilan bahslarda gʻalaba qozonib yetib kelgandi.
Erkaklar oʻrtasida 70 kilogrammgacha vazn toifasida ishtirok etgan Shavkatjon Boltayev ham oʻz ishtirokini yarim finalda toʻxtatdi. Final ostonasida u qozogʻistonlik Torexan Sabirxanga qarshi jang qilib, 0:5 hisobida imkoniyatni boy berib qoʻydi.
Bundan oldingi bosqichlarda u janubiy koreyalik Kim Junsu (4:1) va xitoylik Li Guofeng (5:0) ustidan gʻalabaga erishgandi, ammo oltin uchun jangga chiqa olmadi va turnirdan bronza bilan qaytadigan boʻldi.
Nihoyat -90 kg vazn toifasidagi Toʻrabek Habibullayev oʻz jangida gʻalaba qozondi. Dastlabki bosqichda qozogʻistonlik Nurbek Oʻralbayni (3:2) yenggan Habibullayev yarimfinalda hindistonlik Kapil Puhariyadan ustun keldi (4:1). Endi u 2-oktabr kuni xitoylik Han Huyejanga qarshi oltin uchun jangga chiqadi.
Shu tariqa, boks boʻyicha bahslarda final bosqichida Oʻzbekistondan faqat 3 nafar vakil boʻladi. Bungacha Abdumalik Halokov (-60 kg) va Jahongir Zokirov (+90 kg) final masalasini hal qilgandi.
Futbol
Yarimfinalda mezbon Yaponiyaga qarshi kechgan oʻyinning asosiy vaqtida Oʻzbekiston oʻyin oxirigacha hisobda oldinda borgandi, ammo 88-daqiqada gol oʻtkazib yuborildi (1:1). Qoʻshimcha boʻlimlarda durang hisob saqlanib qoldi, penaltilar seriyasida esa kunchiqar yurt vakillarining qoʻli baland keldi (8:9).
Ravshan Haydarov shogirdlari guruh bosqichida Filippin (5:1), Kuvayt (2:0) va Vetnam (2:0) bilan oʻyinlarda 100 foizlik natija qayd etgan, pley-offning birinchi oʻyinida esa Saudiya Arabistoni vakillarini yirik hisobda taslim qilgandi (3:0).
Endi ushbu jamoa uchinchi oʻrin uchun Xitoy vakillariga qarshi bahs olib boradi.
Slalomda eshkak eshish
Bir kun oldingi saralash bahslaridan oʻtgan Anvar Klevlev bugun yarim finalda (103.62 ball) ham muvaffaqiyatli ishtirok etib, final bosqichiga yoʻl olgandi, ammo finalda Xitoy, Yaponiya va Qozogʻiston vakillaridan ortda qolib (102.54 ball), toʻrtinchi oʻrinni egalladi.
Chim ustida hokkey
Chim ustida hokkey boʻyicha Oʻzbekiston ayollar jamoasi turnirni magʻlubiyat bilan yakunladi. Qozogʻistonga qarshi oʻyinda ham yutqazgan (1:1, 2:4) jamoa soʻngi 12-oʻrinni egalladi. Bungacha jamoa Hindiston (0:19), Tailand (1:3), Yaponiya (1:7) va Singapur (1:3) bilan oʻyinlarda magʻlub boʻlgan, birgina Indoneziya ustidan gʻalaba qozongandi (2:1).
Tennis
Aralash juftlik bahslarida Sevil Yoʻldosheva va Maksim Shin qozogʻistonlik tennischilarga yutqazishdi (1:6, 5:7).
Humoyun Sultonov esa Kvon Sunvu bilan bahsda texnik gʻalabaga erishdi.
Suvga sakrash
10 metrga suvga sakrashda Igor Myalin saralashdan oʻtdi, ammo finalda 6-natijani qayd etdi. Amal Mavlyanov saralashdan oʻta olmadi.
Golf
Golf boʻyicha individual bahslarning 1-turida Sergey Chen 33-, Kanatbek Kurbanbayev 43-, Akbarjon Inoyatov 48-oʻrinni egalladi.
Jamoaviy bahslarda esa Oʻzbekiston 21 jamoa orasida 17-natijani qayd etdi.
Bugungi bahslardan keyin Oʻzbekiston delegatsiyasi jami medallar sonini 54 taga yetkazib (16 oltin, 19 kumush va 19 bronoʻa), toʻrtinchi oʻrinni mustahkamlashda davom etmoqda.
