«Har bir viloyat o‘z ayollarini himoyaga olsin». Reabilitatsiya markazlarida ko‘chada qolgan ayollar bilan ishlanmasligi aytildi

«Hozirda respublika bo‘yicha 180ta markaz faoliyat olib boryapti. Asosiy muammolardan biri shundaki, ko‘chada qolgan ayollar, jabr ko‘rmagan bo‘lsa-da bizning markazga olib kelinmoqda. Ularni qabul qilyapmiz. Chunki boradigan joyi yo‘q. Yonida ikkita farzandi bor. Lekin keyin ularni qaytarib chiqarib yuborish imkoniyati juda qiyin bo‘lyapti. Buning huquqiy asosi ham yo‘q. Yana bir og‘riqli jihat, shu paytgacha reabilitatsiya markazlarida normativ-huquqiy hujjatlar ishlab chiqilmagan. 

Markazlarimizdagi ayollar orasida ruhiy xasta va tushkunlikka tushib qolganlari ko‘p uchraydi. Biz aslida faqatgina zo‘rlikdan jabr ko‘rgan ayollarni qabul qilib, ular bilan ishlashimiz kerak. Chunki ko‘chada qolgan hamma ayollar bilan ishlash imkoniyatimiz yo‘q. Surxondaryo, Qashqadaryo, Namangan va boshqa viloyatlardan bizning markazlarda ayollar yashamoqda. Ularning ikkita, uchtadan bolalari bor. 

Masalaning yana bir chigal tomoni shundaki, ular bizdan uy-joy talab qilishyapti. «Uy-joy bersanglar, Toshkentda qolamiz, shu yerda ishlaymiz, agar bermasanglar, bu yerdan chiqib ketmaymiz», deb tazyiq o‘tkazishga ham harakat qilishyapti. Hozirda 32ta koykamiz mavjud va u yerda 6-7 oylab yashayotgan ayollar bor. Chunki huquqiy hujjat qilinmagan. Buni birgalikda ko‘rib chiqib, ularni chiqarib yuborish bo‘yicha ichki ishlar organlaridan yordam so‘rayapmiz. Hamma viloyatlar o‘zlarining ayollarini himoyaga olsin. Vakillari kelib olib ketishsin. 

Kuni kecha Surxondaryodan bir ayolni olib kelishdi. Uning 3 nafar farzandi erida qolgan. Biz 3 kun muddatga deb qabul qilib oldik. Lekin hozir «men ketmayman, ishlayman, shu yerda qolaman», deyapti. Ular tushkunlikka tushib qolgan ayollar hisoblanadi», deya markaz rahbari so‘zlarini keltirmoqda Kun.uz muxbiri.  

Ma'lum qilinishicha, 2020 yilning o‘tgan 11 oyi davomida ichki ishlar organlari tomonidan turli tazyiq va zo‘ravonliklarga uchragan 11 ming 138 nafar xotin-qizga himoya orderi berilgan. Ularning 9 ming 916 nafari (89 foiz) oilada tazyiq va zo‘ravonlikka uchragan, 5 ming 418 nafariga nisbatan esa jismoniy zo‘ravonlik sodir etilgan. Shuning natijasida 652ta oila ajrashib ketgan.