Rossiyada migrantlarga nisbatan zo‘ravonlik sodir etishga chaqirgan fuqaro shartli jazoga hukm qilindi

Sankt-Peterburgda sud Roman Ivanovni etnik sabablarga ko‘ra zo‘ravonlikka undagani uchun uch yil muddatga shartli qamoq jazosiga hukm qildi, deb xabar bermoqda Sankt-Peterburg sudlarining qo‘shma matbuot xizmati.

Qayd etilishicha, u Rossiya Jinoyat kodeksining 280-moddasi 2-qismi (Internet orqali ekstremistik faoliyatga ommaviy chaqiriqlar) bo‘yicha aybdor deb topilgan.

Ish materiallariga ko‘ra, joriy yilning may oyida u «VKontakte» ijtimoiy tarmog‘idagi «Natsistlar jamiyati» guruhida qirg‘izlar, tojiklar va Kavkaz xalqlari vakillariga qarshi zo‘ravonlik harakatlariga chaqirgan.

Ta’kidlanishicha, Ivanovning o‘zi aybiga to‘liq iqror bo‘lgan.

Natijada, sud Ivanovni 3 yillik sinov muddati bilan 3 yil shartli qamoq jazosiga hukm qildi. Shuningdek, u 2 yil 10 oy muddatga jamoat tashkilotlari/jamoalarning ishida ishtirok etish, shu jumladan veb-saytlar, elektron yoki axborot-telekommunikatsiya tarmoqlari, shu jumladan internet tarmog‘idan foydalanish bilan bog‘liq faoliyat bilan shug‘ullanish huquqidan mahrum etiladi.