Ehtiyot bo‘ling! Firibgarlar internetda yutuqli o‘yinlar haqida feyk tarqatmoqda

Ijtimoiy tarmoqlarda UZTELECOM nomidan anketa to‘ldirish evaziga 3 mln so‘m tarqatilayotgani va Coca-sola kompaniyasi tomonidan yutuqli o‘yinlar o‘tkazilayotganligi haqidagi xabarlar tarqaldi.

Qayd etilishicha, mazkur ma’lumotlar yolg‘on va haqiqatga mos kelmaydi.

“Bunday firibgarlarning maqsadi sizning kartangiz ma’lumotlarini aniqlash va pul yechish, shuningdek, ularning "ma’lumotlar bazasi" uchun telefon raqamingizni olishdan iborat. Hushyor bo‘ling va ushbu postni yuborib, yaqinlaringizni ogohlantiring”, deyiladi UZTELECOM xabarida.

Shuningdek, Telegram’da Coca-cola nomidan ham soxta xabar tarqatilgan. Unda ko‘rsatilgan manzilga kirib, ayrim shartlarni bajarsangiz, minglab sovg‘alardan birini tekinga qo‘lga kiritishingiz aytilgan. Bu ham firibgarlarning tuzog‘i hisoblanadi.

Internet va ijtimoiy tarmoqlar foydalanuvchilaridan zaruriyat bo‘lmaganda, o‘zi bilmagan va ishonmagan har xil so‘rovnoma, savol-javob, aksiyalar, elektron havolalar, elektron va onlayn o‘yinlar va boshqa feyk e’lonlarga kirmaslikni hamda o‘zining shaxsiy ma’lumotlarini oshkor etib aldanib qolmaslikni so‘rab qolamiz.