16:14 / 02.08.2022
3684

Senatda Koreya bilan hamkorlik komissiyasi majlisi o‘tkazildi. Norboyeva vazirliklarni tanqid qildi

Bugun, 2 avgust kuni Senatning Koreya Respublikasi Milliy Assambleyasi bilan hamkorlik bo‘yicha komissiyasining navbatdagi majlisi bo‘lib o‘tdi. Unda qator masalalar tanqidiy ruhda ko‘rib chiqildi.

Foto: Oliy Majlis Senati axborot xizmati

Unda aytilishicha, 2021 yil 28 dekabrdagi 67-sonli prezident qarori bilan tasdiqlangan 3 ta amaliy harakat rejasida jami 116 ta banddagi vazifalarning 5 tasi bajarilgan, 77 tasi o‘z vaqtida bajarilmoqda, 34 tasining (29 foizi) ijrosi kechiktirilmoqda.

Majlisda Senat raisi Tanzila Norboyeva amaliy harakatlar rejalari («yo‘l xarita»lari) ijrosining borishi to‘g‘risida fikrlarini bildirdi.

«Yo‘l xarita»larning ijro holatini qoniqarli deb bo‘lmaydi

«1 va 2-ilova bilan tasdiqlangan «yo‘l xarita»lari ijrosiga Tashqi ishlar vazirligi, 3-ilova bilan tasdiqlangan «yo‘l xarita»si ijrosiga Investitsiyalar va tashqi savdo vazirligi mas’ul.

Investitsiyalar va tashqi savdo vazirligi – xorijiy investitsiyalarni jalb qilishni muvofiqlashtirish, maqsadli foydalanilishini monitoring qilish, xalqaro moliya institutlari va xorijiy hukumat moliya tashkilotlari bilan hamkorlik qilish sohasida yagona davlat siyosatini shakllantirish va muvofiqlashtirish uchun mas’ul vakolatli davlat organi hisoblanadi. Biroq vazirlikning ishi sezilmayapti, ayrim loyihalar o‘z holiga tashlab qo‘yilgan, muammoning sabablarini o‘rganish va bartaraf etish bo‘yicha amaliy harakatlar ko‘rinmayapti.

Vazirlik kiritgan ma’lumotiga ko‘ra, 40 ta investitsiya loyihasidan 10 tasi qoloqlik bilan amalga oshirilyapti. Muammoning sabablari keltirilmagan, takliflar esa nomiga (belgilangan vazifani bajarish haqida) berilmoqda. O‘rganishlarimiz qoloqlik bilan amalga oshirilayotgan loyihalar soni ko‘pligini ko‘rsatmoqda, ya’ni 21 ta loyiha o‘z vaqtida bajarilmayapti. Muammolar sababini o‘rgandik, har bir «yo‘l xarita» bo‘yicha alohida-alohida to‘xtalib o‘tamiz.

I. Koreya Respublikasiga davlat tashrifi doirasida imzolangan hujjatlarning amalga oshirilishi (muvofiqlashtirish uchun mas’ul Tashqi ishlar vazirligi).

1-«yo‘l xarita» bo‘yicha jami 11 ta bandning 8 tasi o‘z vaqtida amalga oshirilmoqda. Sog‘liqni saqlash vazirligiga tegishli 3 ta banddagi vazifalar ijrosi sust olib borilmoqda. Xususan:

«Yo‘l xarita»ning 2-bandiga muvofiq sog‘liqni saqlash sohasida, jumladan, kasalliklarning oldini olish va ularga qarshi chora ko‘rish bo‘yicha hamkorlik Bitimi imzolanishi kerak edi (muddat – 25 may). Bajarilmadi.

Ushbu masalada Koreya tomoni davlat ichki tartiblarini shu yilning yanvar oyidayoq bajargan. Biroq Sog‘liqni saqlash vazirligi davlat tartib-taomillarini bajarmasdan tegishli prezident qarori loyihasini kechiktirmoqda.

«Yo‘l xarita»ning 11-bandiga muvofiq mintaqaviy tibbiyot muassasalarini tibbiy asbob-uskunalar bilan jihozlash bo‘yicha loyiha hujjatlarini va Hukumat qarorini ishlab chiqib, tasdiqlash uchun kiritish kerak edi (muddat – fevral). Bajarilmadi.

Koreya tomonidan «O‘zbekiston Respublikasi sog‘liqni saqlash muassasalarini tibbiyot uskunalari bilan jihozlash» qarz shartnomasi imzolanib, 2021 yil 27 dekabrda Moliya vazirligiga taqdim etilgan. Oradan yarim yil o‘tsa ham, haligacha Sog‘liqni saqlash vazirligi loyiha hujjatlarini va hukumatning tegishli qarori loyihasini kechiktirmoqda. Vazirlikka Tashqi ishlar vazirligidan ushbu masalalarni tezlashtirish bo‘yicha murojaat ham yuborilgan.

Savol (Sog‘liqni saqlash vazirligiga): Nima sababdan ushbu vazifalar bajarilmayapti? Muammo nimada?

Ustuvor yo‘nalishlarda o‘zaro manfaatli hamkorlikni yanada kengaytirish borasidagi ishlar (muvofiqlashtirish uchun mas’ul Tashqi ishlar vazirligi).

2-yo‘l xarita bo‘yicha jami 65 ta bandning 55 tasi (85 foizi) o‘z vaqtida amalga oshirilmoqda, 10 ta banddagi vazifalar ijrosi esa kechiktirilmoqda. Xususan:

Qonunchilik muammolari va parlament tadqiqotlari instituti «Yo‘l xarita»ning 12-bandiga muvofiq Koreya Respublikasi Milliy Assambleyasi tadqiqot xizmati bilan hamkorlik aloqalarni yanada rivojlantirish, tegishincha chora-tadbirlar loyihasini kelishib, tasdiqlash vazifasi belgilangan edi (muddat – mart).

Institut tomonidan chora-tadbirlar rejasi loyihasi ishlab chiqilib, shu yil mart oyida Koreya xalqaro hamkorlik agentligining (KOIKA) O‘zbekistondagi vakolatxonasiga kelishish uchun yuborilgan. Lekin bugungi kunga qadar (oradan 2 oy o‘tdi) chora-tadbirlar loyihasi Koreya tomoni bilan kelishilib, tasdiqlanmagan.

Investitsiyalar va tashqi savdo vazirligi «Yo‘l xarita»ning 16-bandiga muvofiq O‘zbekiston va Koreya o‘rtasida Erkin savdo to‘g‘risidagi bitimni imzolash bo‘yicha ishlarni jadallashtirish, jumladan, shu yil 1-choragida savdo loyihasini kelishish hamda bosh muzokarachilar o‘rtasidagi muzokaralarning navbatdagi 3-raundini o‘tkazish kerak edi. Bajarilmadi.

2022 yil 12 yanvarda ishchi guruhning rahbarlari o‘rtasida onlayn shaklda muzokaralar bo‘lib o‘tgan. Uchrashuv davomida bosh muzokarachilar o‘rtasidagi navbatdagi sessiyalararo muzokaralar kun tartibi muhokama qilingan, xolos. 

Nima sababdan ushbu muzokaralarning 3-raundi o‘tkazilmadi?» dedi Norboyeva tanqidiy ruhda o‘tgan majlisda.

Mavzuga oid
Top