O‘zbekiston, Qozog‘iston va Qirg‘iziston vakillari energetika sohasidagi hamkorlikni muhokama qildi

Tomonlar kuz-qish davrida rejalashtirilgan elektr energiyasini yetkazib berish, vegetatsiya davrida fermer xo‘jaliklarini sug‘orish suvi bilan ta’minlash, shuningdek, Qambarota GES-1 qurilishi bo‘yicha qo‘shma loyihani amalga oshirishga oid qator masalalarni muhokama etdi.

Xususan, vazirlar mamlakatlardagi energetika obektlarini kuz-qish mavsumiga tayyorlash, o‘zaro zaxiralash, elektr energiyasi va rejali yetkazib berishni tartibga solish, uning tranzitini ta’minlash masalalarini tahlil qildi.

Shuningdek, vegetatsiya davrida mamlakatlarni sug‘orish suvi bilan ta’minlash muammosi ham muhokama qilindi. Suv xo‘jaligi boshqarmalari rahbarlari zarur miqdorda suv yetkazib berish bo‘yicha oldingi barcha majburiyatlarni tasdiqladi.

Qambarota GES-1 qo‘shma qurilish loyihasini muhokama qilish chog‘ida Qozog‘iston, O‘zbekiston va Qirg‘iziston energetika idoralari rahbarlari mintaqani toza elektr energiyasi bilan ta’minlashni ko‘paytirish, shuningdek, mamlakatlarni elektr energiyasi va suv bilan ta’minlash maqsadida uni amalga oshirish muhimligini ta’kidladi.

«Bundan tashqari, biz mintaqada energiya tizimlarini rivojlantirish rejalarini muhokama qildik. Qozog‘iston, O‘zbekiston va Qirg‘izistonda yangi avlod, jumladan, IES qurish bo‘yicha keng ko‘lamli rejalar yetarli. Buning uchun yangi rejimlar yaratish, yangi tarmoqlar, jumladan, davlatlararo elektr uzatish liniyalari, kichik stansiyalar barpo etish zarur. Biz ana shu masalalarning barchasini muvofiqlashtiruvchi, yagona energetika tizimimizni optimal rivojlantirish, oqimlarning maqbul rejimlari, generatsiyadan foydalanish, o‘zaro zaxiralash masalalarini ta’minlaydigan yagona ishchi guruh tuzishga kelishib oldik», dedi Qozog‘iston energetika vaziri Almasadam Satqaliyev.

Uchrashuvda erishilgan barcha kelishuvlar haqida Qozog‘iston, O‘zbekiston va Qirg‘iziston hukumatlari rahbarlariga ma’lumot berilishi aytildi.