Putin MDH davlatlarini chegaradagi vaziyatga e’tibor qaratishga chaqirdi

«Bizning geosiyosiy raqiblarimiz o‘z maqsadlaridan kelib chiqib, yaqinda aytganimizdek, hammani, har kimni, istalgan davlatni fosh qilishga, uni inqiroz o‘chog‘iga aylantirishga, rangli inqilobni qo‘zg‘atishga va qonli qirg‘inni boshlashga tayyor. Biz bularning barchasini bir necha bor ko‘rganmiz», — dedi Putin MDH davlatlari razvedka xizmatlari rahbarlari bilan suhbat chog‘ida.

U MDH mamlakatlari xavfsizligiga tahdidlarni tahlil qilishga chaqirib, chegaralardagi vaziyat e’tibor talab qilishini ta’kidladi. 

«Shubhasiz, Afg‘oniston hududida joylashgan xalqaro terrorchilar chegaradosh davlatlar, jumladan, MDH davlatlari bilan bog‘liq jinoiy rejalar tuzishi mumkin», — dedi Rossiya rahbari.

Putinning so‘zlariga ko‘ra, MDH mamlakatlari razvedka xizmatlari mavjud va yuzaga kelishi mumkin bo‘lgan tahdidlarga qarshi kurashish uchun muvofiqlashtirilgan holda harakat qilishi va bir-birini qo‘llab-quvvatlashi kerak. U turli yo‘nalishlarda: axborot almashinuvidan tortib, kadrlar tayyorlashgacha bo‘lgan hamkorlikni rivojlantirish maqsadga muvofiqligini ta’kidladi.

Putin, shuningdek, MDH davlatlarining savdo aylanmasi AQSh va uning ittifoqchilari bosimiga qaramay o‘sib borayotganini qo‘shimcha qildi.

Rossiya prezidenti Vladimir Putinning MDH maxsus xizmatlari va razvedka tashkilotlari rahbarlari bilan videomuloqotida O‘zbekiston DXX raisi Abdusalom Azizov ham ishtirok etdi.