Aholi orasida suv quvurlari orqali vabo tarqalishi mumkinligi to‘g‘risida gap-so‘zlar tarqaldi. «O‘zsuvta’minot» bunga ishonmaslikni so‘radi

Shu kunlarda aholi orasida ichimlik suvi quvurlari va jo‘mraklar orqali vabo kasalligi tarqalishi mumkinligi to‘g‘risida turli mish-mishlar tarqaldi, deb xabar bermoqda «O‘zsuvta’minot» AJ axborot xizmati.

Foto: Kun.uz

Korxona fuqarolardan bu kabi yolg‘on xabarlarga ishonmaslikni va jo‘mraklardan suv ichmaslik to‘g‘risidagi chaqiriqlarga quloq solmaslikni so‘ragan.

Bildirilishicha, ichimlik suvi sifati respublikadagi 79 ta laboratoriya tomonidan kun-u tun har tomonlama nazorat qilinadi. Suv tarmoqlari yoki jo‘mraklar orqali biron-bir kasallik tarqalishiga yo‘l qo‘yilmaydi.

Ma’lum qilinishicha, ular tomonidan har oyda turli tahlillar uchun o‘rtacha 17 200 ta namuna olinadi.

Ichimlik suvini aholiga yetkazib berishdan oldin suv suyuq xlor, natriy gipoxlorit, kalsiy gipoxlorit kabi xlorli reagentlar bilan zararsizlantiriladi.