Bosh prokuratura huzuridagi Departament maʼlumotiga koʻra, holat uning Furqat tumani boʻlimi oʻtkazgan tergovga qadar tekshiruvda aniqlangan.
Tekshiruv maʼlumotlarida qayd etilishicha, «Fargʻona suv taʼminoti» AJning Furqat tumani boʻlimi xodimi X.T. «A.P.» MChJga nisbatan ichimlik suvidan noqonuniy foydalanish holati boʻyicha oʻrganish dalolatnomasini rasmiylashtirgan.
Shunga qaramay, u fuqaro J.M.ga goʻyoki mazkur korxona hududidagi uning sexida 8,4 mln soʻmlik ichimlik suvidan noqonuniy foydalanish holati yuzasidan dalolatnoma tuzganini aytgan. Soʻng 2 mln soʻm evaziga ushbu hujjatni yoʻq qilib berishni vaʼda qilgan.
Departament xabarida X.T. shu tariqa 2 mln soʻmni firibgarlik yoʻli bilan qoʻlga kiritgani bildirilgan. Uning mazkur pulni qaytargani protsessual tartibda rasmiylashtirilgan.
Rasmiy maʼlumotda xodim muqaddam sudlangani ham qayd etilgan.
Holat yuzasidan Jinoyat kodeksining 168-moddasi - firibgarlik bilan jinoyat ishi qoʻzgʻatilgan. Tergov harakatlari davom etmoqda.
