Bugun, 27 noyabr kuni Axborot va ommaviy kommunikatsiyalar agentligi tomonidan «Ko‘ngil ko‘zi» loyihasi doirasida Toshkent shahridagi 77-sonli ixtisoslashtirilgan ko‘zi ojizlar maktab-internati o‘quvchilari bilan maxsus suhbat tashkil etildi.
Unda o‘quvchilar o‘z qiziqishlari xususida gapirishdi, agentlik rahbarlariga savollar va takliflar bilan murojaat qilishdi.
Jumladan, maktab o‘quvchilari ayni paytda musiqa va san'at maktabida ta'lim olish uchun to‘lov bilan bog‘liq muammolari borligi, lekin musiqaga qiziqishlari balandligi haqida ma'lumot berib, to‘lov puli bilan bog‘liq imtiyoz berilishi imkoni bor yoki yo‘qligi haqida so‘rashdi.
«Ko‘ngil ko‘zi» loyihasi doirasida musiqa va san'at maktablarida o‘qish uchun haq to‘lash tizimi yuzasidan Vazirlar Mahkamasiga o‘z takliflarimizni berib, yaqin kunlarda unga o‘zgartirish kiritilishiga harakat qilamiz», deya ushbu muammo yuzasidan munosabat bildirdi agentlik direktori Komil Allamjonov.
Eslatib o‘tamiz, mazkur muammo biroz vaqt oldin tahririyat tomonidan ham o‘rganilib, mutasaddi tashkilotlar fikri olingan edi.
Musiqa va san'at maktablarida ta'lim olish uchun to‘lov Moliya vazirligi va Xalq ta'limi vazirligi tomonidan tasdiqlangan «Ota-onalar tomonidan bolalarning musiqa va san'at maktablarida o‘qishi uchun haq to‘lash va undan foydalanish tartibi to‘g‘risida»gi nizom asosida tartibga solinadi.
Unda qator talablar asosida ayrim bolalar bepul va chegirma asosida ta'lim olishiga imkon berilgan bo‘lsa-da, bu ro‘yxatga imkoniyati cheklangan bolalar kiritilmagan.
