“Navoiyuran” va NKMK xodimlari uran radioaktiv moddasini sotishga uringani ma’lum bo‘ldi

Uran moddasini sotishga uringan bir guruh shaxslar jinoiy jazoga tortildi. Ular orasida “Navoiyuran” va NKMK xodimlari bor.

Sudning hukmiga ko‘ra, J.I. “Navoiyuran” DK “Sobirsoy” geotexnologik konida chilangar vazifasida ishlab kelgan. U 2024 yil sentabr oyida jinoyat ishining qismi alohida ish yurituvga ajratilgan shaxs bilan uran radioaktiv moddasini sotib, noqonuniy daromad ko‘rish maqsadida o‘zaro kelishgan. So‘ng ushbu shaxsdan 120 gramm bo‘lgan uran radioaktiv moddasini olib, O.M.ga sotib olishi mumkin bo‘lgan mijozlarga ko‘rsatish uchun bergan.

O.M. 120 gramm og‘irlikdagi uranni sotib oladigan mijoz topish taklifi bilan F.S.ga berib yuborgan. F.S. esa mijoz topish maqsadida F.T. va N.U. bilan tabiiy uran radioaktiv moddasini sotish bo‘yicha kelishgan. So‘ngra F.T. orqali mijoz sifatida Z.X.ni, N.U. orqali A.K.ni topgan hamda ularga tabiiy uran radioaktiv moddasining har bir grammini 2 ming dollardan sotishini aytgan.

A.K. uran radioaktiv moddasini sotish qonunga xilof ekanini bilib, holat yuzasidan huquqni muhofaza qiluvchi organlarga ariza bilan murojaat qilgan. 2024 yil 9 oktyabr kuni soat 12:30 larda F.S. va N.U. 67 gramm uranni Karmana tuman hududida tekshirib ko‘rish sharti bilan A.K.ga berib ketishgan. A.K. moddani ixtiyoriy ravishda Navoiy shahar IIB xodimlariga topshirgan.

Mijoz sifatida topilgan Z.X. ham huquqni muxofaza qiluvchi organlarga ariza bilan murojaat qilgan. 2024 yil 9 oktyabr kuni uning arizasi asosida huquqni muhofaza qiluvchi organlar xodimlari tomonidan Navoiy shahri hududida tezkor tadbir o‘tkazilgan. Unda F.S. va F.T. O.M.dan olgan uranning 53 grammini 100 700 dollarga sotayotganda qo‘lga olingan.

2024 yil 10 oktyabr kuni tezkor tadbir davom ettirilgan va J.I. o‘z ulushi sifatida 40 ming dollar olganda ushlangan.

Jinoyat ishlari bo‘yicha Navoiy shahar sudining 2025 yil 14 apreldagi hukmi bilan J.I. va NKMK AJ “Amenzo Amontou” konida chilangar vazifasida ishlagan N.U. Jinoyat kodeksining 252-moddasi (Radioaktiv materiallarni qonunga xilof ravishda egallash) 2-qismining “b” bandi bilan aybli deb topilgan. J.I.ga 2 yil “Navoiyuran” DK tizimida ishlash huquqidan mahrum qilgan holda Jinoyat kodeksining 57-moddasini qo‘llab, 4,5 yil, N.U.ga 2,5 yil muddatga ozodlikdan mahrum qilish jazosi tayinlangan. Mazkur hukm bilan O.M., F.S. va F.T. ham jinoiy jazoga tortilgan.

Navoiy viloyati sudi jinoyat ishlari bo‘yicha sudlov hay’ati apellyatsiya instansiyasining 2025 yil 24 iyuldagi ajrimi bilan dastlabki sud hukmi o‘zgarishsiz qoldirilgan.