Navoiy kon-metallurgiya kombinatida yana insonlar oʻlimi bilan bogʻliq noxush hodisa sodir boʻldi. Bu haqda Kun.uz’ning kombinatdagi manbasi xabar berdi.
Maʼlum qilinishicha, 10-sentabr kuni NKMKning “Qizilqum” kon boshqarmasi tarkibidagi Pistali konida quvur tashuvchi transport shinasi portlab ketgan. Hodisa oqibatida ikki ishchi halok boʻlgan. Shuningdek, yana bir necha kishi turli darajada tan jarohati olgan.
Bu kombinatda soʻnggi 2 oyda insonlar oʻlimi bilan bogʻliq ikkinchi hodisa: 21-iyul kuni Muruntov konida avtoagʻdargich yengil avtomobilni bosib, ezib oʻtib ketgan va oqibatda 2 nafar ishchi hodisa joyida halok boʻlgandi.
UPD: Navoiy kon-metallurgiya kombinati hodisa yuzasidan rasmiy munosabat bildirdi. Unga koʻra, 10-sentabr kuni soat 15:00 larda “Qizilqum” kon boshqarmasi Avtomobil transporti boshqarmasining “Pistali” 1-transport sexining foydalanishda boʻlgan avtomobil shinalarini saqlash maydonida quvur tashuvchi avtomashinaning tirkamasida shinomontaj ishlarini bajarish vaqtida baxtsiz hodisa sodir boʻlgan. Oqibatda 2 nafar ishchi-xodim vafot etgan.
Holat yuzasidan huquqni muhofaza qiluvchi organlar tomonidan tergovga qadar tekshiruv ishlari olib borilayotgani, shuningdek, baxtsiz hodisaning sodir boʻlish holatlari va kelib chiqish sabablari oʻrganilayotgani bildirilgan.
