Qimmatli qog‘ozlar markaziy depozitariysi Markaziy bankka o‘tkazilmoqda

“Kapital bozorini rivojlantirishning qo‘shimcha chora-tadbirlari to‘g‘risida” prezident qarori qabul qilindi.

Qarorga ko‘ra, “Qimmatli qog‘ozlar markaziy depozitariysi” davlat unitar korxonasi “Qimmatli qog‘ozlar markaziy depozitariysi” aksiyadorlik jamiyatiga o‘zgartiriladi. Uning ustav kapitalidagi davlat aksiyalari paketi Markaziy bankka o‘tkaziladi.

Bundan tashqari:

• 2025 yil 1 yanvardan davlat va korporativ qimmatli qog‘ozlarning yagona hisobi “Qimmatli qog‘ozlar markaziy depozitariysi” AJda yuritiladi;
• 2028 yil 31 dekabrgacha “Qimmatli qog‘ozlar markaziy depozitariysi” AJ, “O‘zbekiston respublika valuta birjasi” AJ va “Toshkent” respublika fond birjasi” AJ mablag‘larni maqsadli ravishda ularni rivojlantirishga yo‘naltirgan holda dividendlarni hisoblash va to‘lashdan ozod qilinadi.

“O‘zbekiston respublika valuta birjasi” AJ ta’sischiligida “Milliy kliring markazi” AJ tashkil etiladi.

Moliyachi Otabek Bakirov Qimmatli qog‘ozlar markaziy depozitariysining Markaziy bankka o‘tkazilishiga munosabat bildirarkan, Markaziy bank to‘g‘risidagi qonunga e’tibor qaratdi. Qonunning 6-moddasiga ko‘ra, MB banklarning kapitallarida va boshqa yuridik shaxslarning ustav fondlarida (ustav kapitallarida) ishtirok etishga haqli emas, bundan valuta birjasining, shuningdek Markaziy bankning faoliyatini ta’minlovchi o‘z tasarrufidagi tashkilotlarning kapitallarida ishtirok etishi mustasno.

“Markaziy bankka bunday vakolat berilishi ikkinchi bosqichdagi depozitariylar va depozitariylar bozorini umumqabul qilingan tendensiyalar va standartlardan chetlatadi”, – deya yozdi mutaxassis.

Ma’lumot uchun, Qimmatli qog‘ozlar markaziy depozitariysi Vazirlar Mahkamasining 1999 yil 21 maydagi qarori bilan tashkil etilgan. Uning vazifasi O‘zbekiston Respublikasi depozitarlik tizimida depo hisobvaraqlari bo‘yicha emissiyaviy qimmatli qog‘ozlarni saqlash, qimmatli qog‘ozlarga bo‘lgan huquqlar hisobini yuritish va emissiyaviy qimmatli qog‘ozlar harakatining yagona tizimini ta’minlashdir.