Korrupsiyaga qarshi kurashish bo‘yicha prezident qarori imzolandi. Qaror loyihasida bo‘lgan, biznes bilan shug‘ullanishi qat'iyan taqiqlanadigan mansabdorlar ro‘yxatini belgilash haqidagi band hujjatdan chiqarib yuborilgan.
6 iyul kuni prezident “Korrupsiyaga qarshi kurashish faoliyatini samarali tashkil etishga doir qo‘shimcha chora-tadbirlar to‘g‘risida”gi qarorni imzoladi.
Qaror loyihasi 23 iyunda muhokamaga chiqarilgan edi. Kun.uz loyiha asosida davlat amaldorlariga biznes bilan shug‘ullanish qat'iyan taqiqlanishi mumkinligi haqida xabar bergandi.
Ma'lum bo‘lishicha, hujjatning imzolangan talqinidan shu qismi chiqarib yuborilgan.
Qaror loyihasining 2-bandida “tadbirkorlik faoliyati bilan shug‘ullanishi qat'iyan taqiqlangan davlat organlari va tashkilotlarining mansabdor shaxslari va xodimlarining ro‘yxatini belgilash” nazarda tutilgandi. Imzolangan rasmiy hujjatdan bu qism o‘rin olmagan.
Loyihaning 2-bandida, shuningdek, “davlat xizmatchilari tomonidan tadbirkorlik faoliyatida ishtirok etishni cheklash” ham ko‘zda tutilgandi. Bu taklif yakunda “davlat xizmatchilari tomonidan tadbirkorlik faoliyatida ishtirok etganligining huquqiy oqibatlarini belgilash”ga almashtirilgan.
Tegishli qonun loyihasini mas'ul vazirlik va idoralar ishlab chiqib, 2021 yil 1 oktyabrgacha Vazirlar Mahkamasiga kiritishi lozim.
Qonun loyihasida manfaatlar to‘qnashuviga yo‘l qo‘yilgan holda tuzilgan shartnomalar haqiqiy emas deb topilishi nazarda tutiladi.
Eslatib o‘tamiz, 6 iyul kuni imzolangan farmonga asosan, davlat xizmatchilarining daromad va mol-mulkini deklaratsiyalash 2022 yil 1 yanvardan boshlanadi. Deklaratsiya topshiradiganlar doirasiga davlat xizmatchilari, ularning turmush o‘rtog‘i va voyaga yetmagan farzandlari kiritilgan.
