Dam olish kunlari yog‘ingarchiliksiz ob-havo saqlanib turadi

Uzoq muddat davom etgan quruq va nisbatan iliq ob-havodan so‘ng, 11-12 oktyabr kunlari O‘zbekiston hududiga Qora dengiz hududlaridan sovuq va nam havo massalari kirib keldi.

Barcha joylarda yomg‘ir yog‘di, ayrim joylarda kuchli bo‘ldi, tog‘li hududlarda qorga aylandi. Ba’zi joylarda shamol tezligi kuchayishi kuzatildi. Havo keskin sovuqlashdi.

"O‘zgidromet" xabariga ko‘ra, bugun ertalab deyarli barcha joylarda yog‘ingarchilik to‘xtadi va kun davomida respublika hududining katta qismida yog‘ingarchiliksiz ob-havo bo‘lishi kutilmoqda. Faqat Farg‘ona vodiysida ba’zi joylarda yomg‘ir yog‘adi, respublikaning tog‘li hududlarida yog‘ingarchilik (yomg‘ir, qor) bo‘ladi.

Yog‘ingarchiliksiz ob-havo dam olish kunlari ham saqlanib turadi. Kechasi va ertalab ba’zi joylarga tuman tushishi mumkin.

Bugun kunduzi havo harorati +10...+15 daraja iliq atrofida bo‘ladi. Shanba va yakshanba kunlari kechasi va ertalab harorat +3...+6 daraja iliqqacha pasayadi, kunduzi havo asta-sekin iliqlashadi va yakshanba kuni kunduzi havo +17...+20 darajagacha isiydi.

Poytaxtda havo o‘zgarib turadi, yog‘ingarchilik kutilmaydi, 14-15 oktyabrda kechasi va ertalab tuman tushishi mumkin. G‘arbiy shamol yo‘nalishini o‘zgartirib, sharqdan 3-8 m/s tezlikda esadi.

Harorat 13 oktyabrda +10...+12 daraja, 14 oktyabrda kechasi +4...+6 daraja, kunduzi +14...+16 daraja, 15 oktyabrda kechasi +5...+7 daraja, kunduzi +17...+19 daraja bo‘ladi.