Rossiya armiyada xizmat qilish uchun shartnoma imzolagan xorijliklarga fuqarolik bera boshlaydi 

Rossiya Davlat dumasi ikkinchi va uchinchi o‘qishda chet elliklar tomonidan Rossiya fuqaroligini olishni soddalashtirish bo‘yicha qonunchilikka o‘zgartirishlarni qabul qildi, deb xabar berdi qonun chiqaruvchi organ sayti.

O‘zgartirishlarga muvofiq, «Rossiya qurolli kuchlari, boshqa qo‘shinlari yoki harbiy tuzilmalarida kamida bir yil muddatga xizmat qilish uchun shartnoma tuzgan chet el fuqarolari» Rossiya fuqaroligini soddalashtirilgan tartibda, yashash uchun ruxsatnomaga ega bo‘lmasdan turib olishlari mumkin.

Amaldagi qonunchilikka ko‘ra, harbiy shartnoma bo‘yicha kamida uch yil xizmat qilish kerak, deyiladi xabarda. 

Bundan tashqari, o‘zgartishlarda askar, matros, serjant va starshina unvonida harbiy xizmatga kirayotgan chet el fuqarosi bilan harbiy xizmatni o‘tash uchun birinchi shartnoma tuziladigan muddatni besh yildan bir yilgacha qisqartirish taklif etilmoqda. 

«Yaqin kelajakda Moskva hukumati Rossiya Mudofaa vazirligiga chet el fuqarolarining harbiy xizmatga kirishini tashkil qilishda yordam berish uchun Saxarovadagi migratsiya markazida to‘liq infratuzilmani joylashtiradi», dedi Rossiya poytaxti meri Sergey Sobyanin.

Bundan oldin Bosh prokuratura xorijdagi o‘zbekistonliklarga murojaat qilib, o‘zbekistonliklarning chet davlatlar harbiylashgan tuzilmalariga yollanishi javobgarlikka sabab bo‘lishi haqida ogohlantirdi.

O‘zbekiston Jinoyat kodeksi 154-moddasi birinchi qismiga ko‘ra yollanish, ya’ni nizolashayotgan davlat fuqarosi yoki harbiy xizmatchisi hisoblanmagan yoxud nazorat qilinib turgan nizolashayotgan davlat hududida doimiy yashamaydigan yoki hech qanday davlat tomonidan qurolli kuchlar tarkibida rasmiy topshiriqni bajarish vakolati berilmagan shaxsning moddiy manfaatdorlik yoki boshqa biror shaxsiy manfaatni ko‘zlab, o‘zga davlat hududida yoki uning tarafini olib qurolli to‘qnashuvda yoxud harbiy harakatlarda qatnashish uchun yollanishi besh yildan o‘n yilgacha ozodlikdan mahrum qilish bilan jazolanadi.

Jinoyat kodeksi 154-1-moddasiga ko‘ra, O‘zbekiston fuqarosi chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga kirishi 3 yilgacha axloq tuzatish ishlari bilan, yollanishi esa 5 yilgacha ozodlikdan mahrum qilish bilan jazolanishiga sabab bo‘ladi.