Prezident «Sog‘lom turmush tarzini hayotga keng tatbiq etish va ommaviy sportni yanada rivojlantirish chora-tadbirlari to‘g‘risida»gi farmonga imzo chekdi.
2021 yil 1 yanvardan boshlab, barcha davlat organlari va tashkilotlarida:
- mehnat jamoalarida sog‘lom turmush tarzi va ommaviy sportni rivojlantirish bo‘yicha xodimga «Sport targ‘ibotchisi» qo‘shimcha vazifasi yuklanib, uning ish haqiga 20 foiz ustama belgilanadi;
- haftada kamida bir marta, ish vaqtidan so‘ng rahbar va barcha xodimlari jismoniy tarbiya va sport mashg‘ulotlari (yugurish, stritbol, futbol, badminton, voleybol, basketbol, stol tennisi, suzish va boshqalar) bilan shug‘ullanishi yo‘lga qo‘yiladi;
- har shanba soat 14:00 dan keyin kuni xodimlar va ularning oila a'zolari o‘rtasida yugurish, stritbol, futbol, badminton, voleybol, basketbol, stol tennisi, suzish va boshqa sport turlari bo‘yicha ommaviy sport musobaqalari tashkil etiladi. Bunda, musobaqalar bayramona ruhda, «shou» ko‘rinishida o‘tkazilishiga, g‘olib va sovrindorlar munosib rag‘batlantirilishiga alohida e'tibor qaratiladi;
- trenajyor zali, «Workout» maydonchasi, sport maydonchalari va xonalari, sport mashg‘ulotlari va musobaqalarini moliyalashtirish davlat organlari va tashkilotlarining budjetdan tashqari mablag‘lari hamda boshqa qonuniy manbalar hisobidan amalga oshiriladi;
- birinchi rahbarlarga «shaxsiy namuna» tamoyili asosida o‘zlarining antropometrik ko‘rsatkichlarini (semizlik darajasi, vazn indeksini kamaytirish, salomatlikni mustahkamlash) yaxshilash orqali xodimlarning antropometrik ko‘rsatkichlari yaxshilanishiga qaratilgan chora-tadbirlarni amalga oshirish topshirildi.
2021 yil 1 iyuldan boshlab, vazirlik, idora, korxona, tashkilot, mahalliy davlat hokimiyati organlari rahbar va xodimlarining antropometrik ko‘rsatkichlarini baholash yo‘lga qo‘yiladi. Ko‘rsatkichlar reyting asosida tahlil qilinib, natijalarni onlayn kuzatish tizimi ishlab chiqiladi.
Hududlarda ommaviy sport bilan shug‘ullanuvchilar sonining oshishi, sog‘lom ovqatlanishi (tarkibida tuz, qand va yog‘ miqdori ko‘p bo‘lgan hamda xamirli taom va shirinliklarni, non mahsulotlarini iste'mol qilishning qisqartirishi), zararli odatlar (alkogol va tamaki)dan voz kechish yo‘li bilan kasallikka chalinish, semizlik va bevaqt vafot etish ko‘rsatkichlarining kamayishiga qarab, hokimliklar ishiga baho beriladi. Bu bo‘yicha reyting ishlab chiqilib, «Sog‘lom turmush tarzi» platformasi bilan integratsiya qilinadi.
Reyting ko‘rsatkichlarini bosh vazir o‘rinbosari A.Abduhakimov Oliy Majlis palatalariga taqdim etadi. Shu asosda eng past reytingga ega davlat organlari rahbarlarining faoliyati har yarim yillikda tanqidiy muhokama qilinadi. Aksincha, eng yuqori reyting to‘plagan rahbarlar rag‘batlantiriladi.
2021 yildan boshlab, Jismoniy tarbiya va sport vazirligi «Sog‘lom turmush tarzi» platformasida ro‘yxatdan o‘tgan va undan foydalangan jismoniy shaxslar soniga hamda ularning sport natijalariga qarab, vazirlik va idoralar, mahalliy davlat hokimiyati organlari rahbarlarining har chorak yakuni bo‘yicha reytingi tuziladi va ular faoliyatiga Vazirlar Mahkamasi baho beradi.
«Sport» telekanalida davlat organlari va tashkilotlari, mahalliy davlat hokimiyati organlari rahbarlari va xodimlarining jismoniy tarbiya va sport bilan shug‘ullanishi, xodimlar va ularning oila a'zolari o‘rtasidagi ommaviy sport musobaqalari yoritib boriladi.
Qoraqalpog‘iston Respublikasi, viloyatlar va Toshkent shahar, tuman, shahar hokimliklari, davlat organlari va tashkilotlari:
- har yili 1 dekabrga qadar keyingi yil uchun yil davomida o‘tkaziladigan haftalik musobaqalarni o‘tkazish kalendar rejasini tasdiqlaydi;
- yillik xarajatlar smetasini shakllantirishda mazkur maqsadlar uchun mablag‘lar ajratilishini nazarda tutadi.
Davlat organlari va tashkilotlarining kasaba uyushmalari va ish beruvchilar o‘rtasidagi jamoa shartnomalarida:
- ish kuni davomida ishlab chiqarish gimnastikasi mashqlari;
- texnologiya, ishlab chiqarish va ish sharoitlaridan kelib chiqib, xodimlarga ishlab chiqarish gimnastikasi mashqlarini bajarishi uchun ish vaqtiga kiritiladigan maxsus tanaffuslar belgilanadi.
