Ijtimoiy tarmoqlarda Surxondaryo viloyati hokimi To‘ra Bobolov Angor tumani prokurori Sirojiddin Ramazonovni haqoratlagani, uni sektor rahbari sifatida ish ko‘rsatmayotganlikda ayblagani bilan bog‘liq audioyozuv tarqaldi.
Suhbat jarayonidan anglash mumkinki, viloyat hokimi Bobolov prokurorni tumanda sektor rahbari sifatida yetarli darajada ish olib bormayotganlikda ayblagan.
Hokim prokurorga tumandagi tadbirkorni chaqirib bezovta qilayotganini aytgan. Bunga javoban Ramazonov: “Davlatning pulini yegani uchun chaqirganman”, deb e’tiroz bildirgan.
Suhbat avval boshdan ziddiyatli boshlangani uchun ikki tomon ham hurmatni chetga surib qo‘ygan.
“Tilingni bir qarich qilasan menga! Itaraman men, b***t! O‘zingcha menga g‘uddayma, jo‘ra! Yoqmayotan bo‘lsa ket n***y b***t. Sen nima demoqchisan menga? Senga o‘xshaganni tiqib yuboraman. Tushundingmi? Sen mening sovunimga kir yuvmabsan, og‘ayni. ... tvoyu mat! S***n n***y b***t! Shoshmay tur.
Savolimga javob ber, texnikani kiritdingmi? Javob ber. Eksport qildingmi, javob ber!” degan viloyat hokimi.
To‘ra Bobolov shundan so‘ng telefon orqali prokuror masalasida kim bilandir suhbatlashgan. U suhbatdoshiga Angor prokurorining tili bir qarich ekani, holat bo‘yicha bosh prokuror bilan gaplashishini bildirgan.
Tarqalgan audioyozuv bo‘yicha Surxondaryo viloyati hokimligi munosabat bildirdi. Unga ko‘ra, audiomaterial shu yil fevral oyida hokimlik soatida bo‘lib o‘tgan muhokamadan kesib olinib, “boshqacha talqin qilingan”.
“Asl holatda yig‘ilishda kun tartibiga qo‘yilgan masalalar muhokamasi jarayonida viloyat rahbari Angor tumani sektor rahbarlaridan tumanning investitsiya, eksport va soliq tushumlari bo‘yicha yo‘l qo‘ygan xato va kamchiliklarini tanqidiy muhokama qilib, tanbeh bergan. Shu jumladan, tuman prokuroriga ham. Mazkur yig‘ilish tanqidiy ruhda o‘tganligi sababli viloyat hokimi asabiy holatda gapirishga majbur bo‘lgan”, deyiladi izohda.
Viloyat hokimligi axborot xizmatining qo‘shimcha qilishicha, sektor rahbari sifatida prokurorga hech qanday chora ko‘rilmagan.
Kun.uz'ning viloyat prokuraturasidagi manbasi Surxondaryo viloyat hokimligining munosabatiga e’tiroz bildirdi. Audioyozuv hech qanday montaj emasligi, hokim va prokuror muloqoti 2022 yil fevral emas, 2021 yil dekabr oyida Zoom orqali o‘tkazilgan yig‘ilishdan olinganini ma’lum qildi.
