Jonson kutilmaganda Kiyevga keldi. U Zelenskiy bilan uchrashuvda Kiyevga yangi qurollar va’da qildi

Ukrainaning Buyuk Britaniyadagi elchixonasi ikki davlat rahbarlari suratlarini e’lon qilgan.

Ukraina prezidenti ofisi rahbari o‘rinbosari Andrey Sibiga feysbukdagi sahifasida Jonsonning tashrifi Zelenskiy bilan yakkama-yakka uchrashuv orqali boshlanganini ma’lum qilgan. «Buyuk Britaniya - Ukraina mudofaasini qo‘llab-quvvatlashda yetakchi davlat. Urushga qarshi koalitsiya yetakchisi. Rossiya bosqinchilariga qarshi sanksiyalar bo‘yicha yetakchi», deya yozgan Sibiga.

Juma kuni Jonson Kramatorskdagi vokzalga raketa zarbasi berilishiga va buning oqibatida shahardan evakuatsiya qilinishga tayyorlanayotganlardan 52 kishi halok bo‘lishiga javoban Ukrainaga 100 mln funtlik qo‘shimcha harbiy yordam yuborilishini ma’lum qilgandi. Yetkazib beriladigan qurollar orasida tankka va havo hujumiga qarshi raketa tizimlari, shuningdek, kamikadze-dronlar bor.

Dauning-Stritdagilar Britaniya bosh vaziri «Ukraina xalqi bilan birdamligini namoyish etish uchun» Zelenskiy bilan shaxsan uchrashayotganini aytishgan. «Yetakchilar «Britaniya bundan keyin ham Ukrainani qo‘llashda davom etishi» haqida gaplashishgan, bosh vazir yangi moliyaviy va harbiy yordam paketlarini e’lon qilgan», deyiladi Jonsonning ofisi xabarida.

Zelenskiy bilan uchrashgan britanlar bosh vaziri «Ukraina barcha prognozlarni yo‘qqa chiqargan holda Rossiya qo‘shinlarini Kiyev atrofidan chekintirib, XXI asrning eng buyuk harbiy jasoratini namoyish etgani»ni bildirgan. «Prezident Zelenskiyning ishonchli boshqaruvi va Ukraina xalqining yengib bo‘lmas qahramonligi va jasurligi tufayli hozirda Putinning dahshatli rejalari barbod bo‘lmoqda», degan Jonson.

Shu kunlarda Kiyevga Yevropa ittifoqi rahbariyati ham tashrif buyurgan, delegatsiya tarkibidan Yevrokomissiya rahbari Ursula fon der Lyayyen, YeIning xorijiy ishlar va xavfsizlik siyosati bo‘yicha oliy vakili, tashqi diplomatiya rahbari Jozep Borrel va Slovakiya bosh vaziri Eduard Geger o‘rin olgandi. Ular Rossiya harbiylari chekinishidan keyin tinch aholi vakillari ommaviy o‘ldirilgani dalillari aniqlangan Bucha shahrida ham bo‘lib, qurbonlarni xotirlashgandi.

Shanba kuni Avstriya kansleri Karl Nehammer Ukrainaga tashrif buyurgani xabar qilingandi.  U Kiyevda Volodimir Zelenskiy, bosh vazir Denis Shmigal va Kiyev meri Vitaliy Klichko bilan uchrashuvlar o‘tkazgan.