Shu yil fevralida davlat ro‘yxatidan o‘tgan, 30 maydan “sotuv” reklamalarini boshlagan “Global avto kredit” MChJ odamlarga foizsiz bo‘lib to‘lash sharti bilan qimmatbaho elektromobillarni va’da qilmoqda. GM mashinalari esa yillik 10 foizli ustama bilan 5 yilgacha nasiya savdoga berilishi aytilgan. Firma ijtimoiy tarmoqlardagi kanaliga bir nechta mashina “mijozlarga yetkazib berilgani” haqida videolavha joylashtirgan. Kun.uz bu mashinalar boshqa avtosalonlardan xarid qilinganini aniqladi.
Xo‘rak
Jozibali reklama, oson shartlar va arzon narx – O‘zbekistonda mashina sotib olmoqchi bo‘layotganlarni chuv tushirish uchun mana shu va’dalar yetarli, qanchalik shubhali bo‘lmasin odamlar o‘z oyoqlari bilan sirtmoq ichiga kirib boraverishadi. Buni qariyb 10 yildan buyon davom etib kelayotgan, biri qamalsa boshqasi paydo bo‘layotgan “Avto 60 oy”dan to “Halol avtolizing”gacha bo‘lgan qator firmalar misolida ko‘rish mumkin.
Afsuski, bu ketma-ketlik zanjiri hamon uzilgani yo‘q: “yig‘aman-u, qochaman” qabilidagi shubhali avtosalonlar paydo bo‘lishda va odamlarni chuv tushirishda davom etmoqda. Shunday shubhali firmalardan biri “Global avto kredit” MChJ hisoblanadi. Ushbu firma “xo‘rak” sifatida odamlarga qimmatbaho elektromobillarni foizsiz bo‘lib to‘lash sharti bilan olib berishni va’da qilmoqda.
“Xitoyda odamimiz bor”
“Global avto kredit” MChJ 2025 yil 10 fevral kuni davlat ro‘yxatidan o‘tkazilgan. Faoliyat turi – avtomobillar va yengil motorli transport vositalarining chakana savdosi.
Ustav kapitali 500 mln so‘m sifatida ko‘rsatilgan MChJ ta’sischisi va rahbari Baxtimurodov Bekzod Baxtimurod o‘g‘li hisoblanadi.
MChJ Telegram’da kanal ochib, joriy yil 30 may kunidan “sotuv” reklamalarini e’lon qila boshlagan. Xususan, birinchi reklamada Cobalt mashinalarini “salon narxida” va “halol nasiya” asosida xarid qilish mumkinligi aytiladi. Nasiya savdo sharti sifatida 1 yildan 5 yilgacha yillik foizli ustama taklif qilingan. Qolaversa, mashina mijozning o‘z nomiga rasmiylashtirilishi aytilgan.
