Bugun, 27 avgust kuni AOKAda tashkil etilgan matbuot anjumanida Tashqi ishlar vazirligi boshqarma boshlig‘i Karomiddin Gadoyev BMTning 72-sessiyasida O‘zbekiston prezidenti Shavkat Mirziyoyev ilgari surgan 5 tashabbus natijasi haqida ma'lumot berdi.
“72-sessiya davomida ilgari surilgan 5ta tashabbusdan 4tasi amaliyotga bevosita tatbiq etildi. Jumladan, olib borilgan sa'y-harakatlarning natijasi o‘laroq, oxirgi ikki yil ichida BMT Bosh Assambleyasida O‘zbekistonning bevosita tashabbusi bilan prezidentimiz tomonidan ilgari surilgan 3ta rezolyutsiya qabul qilindi”, dedi u.
Qayd etilishicha, birinchi tashabbus Markaziy Osiyo davlatlari rahbarlarining maslahat uchrashuvlari bo‘lib, u bevosita tasdig‘ini topgan. Bundan tashqari, BMT Bosh Assambleyasining Markaziy Osiyoda tinchlik, barqarorlik va izchil taraqqiyotni ta'minlash bo‘yicha mintaqaviy va xalqaro hamkorlikni mustahkamlash bo‘yicha maxsus rezolyutsiyasi 2018 yilning 2 iyulida jahon hamjamiyati mamlakatlari tomonidan qabul qilingan.
Tashqi ishlar vazirligi boshqarma boshlig‘iga ko‘ra, O‘zbekistonning ishtirokisiz mintaqada bo‘layotgan biror-bir jarayonning muvaffaqiyatga erishishi amri mahol. Shundan kelib chiqib, Shavkat Mirziyoyevning ushbu tashabbusi juda qisqa muddatlarda amaliyotda o‘z tasdig‘ini topdi.
Ikkinchi tashabbus ma'rifat va diniy bag‘rikenglik haqidagi rezolyutsiyaning qabul qilinishi bo‘ldi. Bu rezolyutsiya 2018 yil 12 dekabrda BMT Bosh assambleyasi tomonidan qabul qilindi.
Uchinchi tashabbus sifatida Orol muammosining ko‘tarilganini aytish mumkin. Joriy yilda ushbu tashabbus amaliy tatbiqi davomi sifatida Orolbo‘yini ekologik innovatsiya va texnologiyalar hududi deb e'lon qilish rejalashtirilgan. To‘rtinchi tashabbus Afg‘oniston muammosini hal etish bo‘lgandi.
